Shqipëria në SEPA, Sejko: Transferta me komisione shumë më të ulta

Shqipëria ka hyrë zyrtarisht në zonën evropiane të pagesave SEPA, një hap që do të ulë ndjeshëm kostot e transfertave ndërkombëtare, do të rrisë shpejtësinë e transaksioneve dhe do të garantojë më shumë siguri për përdoruesit.

Në ceremoninë e realizimit të transaksionit të parë SEPA, Guvernatori i Bankës së Shqipërisë, Gent Sejko, e cilësoi këtë zhvillim një arritje madhore që e afron sistemin financiar shqiptar me standardet e Bashkimit Evropian. Ai tha se vetëm gjatë vitit të parë, përfitimet e drejtpërdrejta pritet të arrijnë rreth 20 milionë euro, ndërsa në vitet pasuese efekti do të rritet progresivisht.

Sejko kujtoi se përvoja me sistemin AIPS Euro, që funksionon që prej vitit 2022, i ka kursyer tregut vendas afro 140 milionë euro, duke treguar qartë ndikimin pozitiv që pritet nga SEPA në uljen e kostove dhe përmirësimin e efikasitetit të pagesave.

Sipas tij, integrimi në SEPA sjell përfitime të menjëhershme për qytetarët dhe bizneset: tarifat për transfertat drejt vendeve evropiane janë deri në pesë herë më të ulëta se më parë; pagesat bëhen më shpejt, më thjeshtë dhe me standarde të larta sigurie; ndërsa një transaksion nga Tirana në Romë do të ketë koston e njëjtë me një pagesë brenda Shqipërisë.

Guvernatori theksoi se ky hap përfshin jo vetëm uljen e kostove, por edhe një ndikim më të gjerë shoqëror dhe ekonomik. Sipas vlerësimeve të Bankës Botërore, rritja e përdorimit të pagesave dixhitale ndihmon në uljen e informalitetit, ndërsa emigrantët shqiptarë dhe familjet e tyre do të përfitojnë nga dërgimi më i lirë dhe më i sigurt i remitancave përmes kanaleve bankare të SEPA-s.

Në nivel rajonal, shtoi ai, dërgimi i fondeve midis bizneseve të Ballkanit Perëndimor ka qenë deri në dhjetë herë më i kushtueshëm se në vendet e BE-së, por me hyrjen në SEPA, këto tarifa afrohen me standardet evropiane.

“Ky integrim nuk është thjesht një përmirësim teknik, por një arritje strategjike që e bën tregun tonë financiar më konkurrues, rrit besueshmërinë e investitorëve dhe e vendos Shqipërinë në një rrugë të qartë drejt integrimit të plotë evropian,” tha Sejko.

Ai nënvizoi se sfida e radhës është që bankat, bizneset dhe qytetarët të përfitojnë maksimalisht nga ky standard, përmes digjitalizimit të mëtejshëm të pagesave dhe edukimit financiar të publikut.
Banka e Shqipërisë, shtoi ai, do të vijojë të mbështesë sektorin bankar dhe institucionet financiare për të promovuar aktivisht shërbimet SEPA dhe për të përmirësuar platformat dixhitale, në mënyrë që potenciali i këtij integrimi historik të shfrytëzohet plotësisht.