Të dhënat e reja të INSTAT tregojnë se kufiri i varfërisë në Shqipëri për vitin 2024 është vlerësuar në 324.336 lekë në vit për person, ose rreth 27 mijë lekë në muaj.
Kjo do të thotë se çdo qytetar që jeton me më pak se kaq, konsiderohet në rrezik varfërie.
Sipas Anketës së të Ardhurave dhe Nivelit të Jetësës (AANJ), 19.2 për qind e shqiptarëve janë të rrezikuar nga varfëria, një rënie e lehtë me 0.6 pikë përqindjeje krahasuar me vitin 2023. Ndërkohë, numri i individëve nën këtë kufi është ulur me 4.7 për qind krahasuar me një vit më parë.
Të dhënat tregojnë gjithashtu se përfitimet sociale, si pensionet e pleqërisë dhe ato familjare, kanë ndikuar ndjeshëm në uljen e varfërisë.
Nëse këto përfitime do të përjashtoheshin nga të ardhurat familjare, 36.7 për qind e popullsisë do të konsiderohej e varfër. Ndërsa, nëse do të llogariteshin vetëm pensionet, pa ndihmat e tjera sociale, rreziku për varfëri do të ishte 22.7 për qind.
Në të njëjtin raport, privimi material dhe social – që mat pamundësinë për të përballuar nevojat bazë në 13 kategori jetese – ka rënë në 32.8 për qind nga 35.9 për qind në 2023. Ndërsa përqindja e familjeve me punësim shumë të ulëtështë ulur nga 9.7 në 8.4 për qind.
Treguesi i kombinuar i rrezikut për varfëri ose përjashtim social (AROPE) është përmirësuar ndjeshëm, duke rënë në 40.5 për qind nga 43.2 për qind një vit më parë.
Ky përmirësim, sipas ekspertëve, lidhet me rritjen e të ardhurave mesatare dhe ndikimin e skemave sociale, megjithatë varfëria mbetet e lartë, me një në pesë qytetarë që ende jeton nën kufirin minimal të të ardhurave. /skyweb.al
