Biznesmeni dhe ish-presidenti i Kosovës, Behgjet Pacolli, ka reaguar ashpër pas akuzave dhe përfoljeve të fundit që lidhen me projektin e aeroportit të Vlorës, duke i quajtur ato “një komplot të koordinuar kundër tij në Shqipëri”.
Në një postim në rrjetet sociale, Pacolli pyet pse është nisur kjo fushatë kundër emrit të tij, pikërisht në momentin kur aeroporti po i afrohet përfundimit.
“Çfarë është ky komplot i koordinuar në Shqipëri kundër emrit tim, pikërisht tani që ndërtimit të aeroportit po i vjen fundi? Kush po e orkestron këtë fushatë shpifjesh dhe pse?”, shkruan ai.
Pacolli thekson se nuk ka dhënë asnjë intervistë, as ka hapur ndonjë proces gjyqësor që të shërbejë si shkak për përfolje, ndërsa nënvizon se nuk është thirrur nga askush për të dhënë dëshmi apo sqarime.
Ai deklaron se të gjitha investimet e tij janë të ligjshme dhe të dokumentuara:
“Kam dhënë kontributin tim të ndershëm me qindra milionë euro investime, që vijnë 100% nga asetet e mia personale, të garantuara me fondet dhe kolateralet e mia private. Asnjë qindarkë publike nuk është përdorur. Çdo gjë ka ardhur nga puna, besimi dhe sakrifica ime,” shkruan Pacolli.
Në mbyllje të reagimit, biznesmeni kosovar thekson se nuk do të tërhiqet përballë këtyre sulmeve:
“Nuk mund të duroj më këtë padrejtësi ku përbalten emri, dinjiteti dhe investimi im. Këto sulme të organizuara do t’i përballoj me të vërtetën dhe me faktet në dorë.” /skyweb.al
