Nga 1 janari 2026, blerja e një prone në Shqipëri do të kushtojë më shtrenjtë. Ministria e Financave ka përgatitur projektligjin që përcakton çmimet e reja të referencës për pasuritë e paluajtshme në të gjitha qarqet e vendit, përjashtuar Bashkinë e Tiranës. Drafti pritet të kalojë së shpejti për diskutim në komisionet parlamentare përpara miratimit përfundimtar.
Sipas dokumentit, Shkodra mbetet qarku me çmimet më të ulëta, nga 10.500 lekë/m² në Fushë-Arrëz deri në 75.000 lekë/m² në qytetin e Shkodrës.
Në Gjirokastër, çmimi minimal nis nga 17.000 lekë/m² në Memaliaj dhe arrin 63.000 lekë/m² në kryeqytetin e qarkut.
Në Berat, vlerat variojnë nga 26.000 lekë/m² në Skrapar deri në 55.000 lekë/m² në Berat.
Në Fier, çmimet shkojnë nga 32.000 lekë/m² në Patos deri në 62.000 lekë/m² në qytetin e Fierit.
Në Korçë, banesat nisin nga 31.300 lekë/m² në Kolonjë dhe arrijnë 70.000 lekë/m² në qytetin e Korçës.
Në Kukës, çmimet janë nga 32.000 lekë/m² në Bajram Curri deri në 58.000 lekë/m² në Kukës.
Në Lezhë, vlerat luhaten nga 36.000 lekë/m² në Milot deri në 70.000 lekë/m² në Shëngjin.
Në Dibër, çmimet variojnë nga 40.000 lekë/m² në Klos deri në 52.000 lekë/m² në Peshkopi.
Në Elbasan, nga 40.000 lekë/m² në Belsh deri në 60.000 lekë/m² në qytetin e Elbasanit.
Në Durrës, çmimet shkojnë nga 43.000 lekë/m² në Shijak deri në 200.000 lekë/m² në zonën 13 të qytetit.
Në Vlorë, nga 31.000 lekë/m² në Finiq deri në 200.000 lekë/m² në zonën 7 të qytetit, që përfshin ishullin e Sazanit.
Në qarkun Tiranë, i cili ka kategorizim të veçantë, çmimet e reja përjashtojnë vetëm njësitë urbane jashtë kryeqytetit: nga 46.000 lekë/m² në Rrogozhinë deri në 75.000 lekë/m² në Kamëz. Ndërkohë, në qytetin e Tiranës, çmimet ekzistuese të referencës arrijnë deri në 228.000 lekë/m² në njësinë nr. 5, raporton TvScan.
Referuar metodologjisë, vlerat e reja janë bazuar mbi shitblerjet e katër viteve të fundit, pozicionin gjeografik, sistemin urban dhe tendencat e tregut imobiliar. Kategoritë përfshijnë ndërtesa, apartamente, shtëpi, garazhe, bodrume dhe njësi tregtare.
Për njësitë tregtare e të shërbimit, çmimi referencë është 1.5 herë më i lartë se ai i zonës përkatëse, ndërsa në Tiranë, ky raport është dyfish. Këshillat bashkiakë do të kenë të drejtë të bëjnë ndryshime deri në ±30% mbi çmimet e përcaktuara nga Ministria e Financave.
Projektligji pritet të ndikojë drejtpërdrejt në çmimet e tregut imobiliar dhe taksat e pasurisë, duke bërë që nga 1 janari 2026, pronat në Shqipëri të kushtojnë më shtrenjtë.
