Çdo udhëtim përbëhet nga qindra momente që ndikojnë në përvojën e udhëtarit, nga momenti i check-in deri te shërbimi gjatë fluturimit.
Për këtë arsye, Forbes Travel Guide ka shpallur fituesit e “Verified Air Travel Awards 2025”, një vlerësim prestigjioz që rendit kompanitë ajrore dhe aeroportet me shërbimin më cilësor në botë.
Në edicionin e dytë të çmimeve, Emirates u shpall sërish linja ajrore më e mirë ndërkombëtare, ndërsa Delta Air Lines mori titullin e linjës më të mirë amerikane. Changi Airport në Singapor fitoi çmimin për aeroportin më të mirë ndërkombëtar, dhe LaGuardia Airport në Nju Jork u vlerësua si aeroporti më i mirë në SHBA, pas investimit gjigant prej 8 miliardë dollarësh që e ka transformuar në një nga terminalet më moderne dhe komode në botë, raporton Skyweb.al.
Çmimet u përcaktuan nga një komision editorial i Forbes Travel Guide dhe mbi 9 mijë ekspertë udhëtimesh dhe mikpritjeje, përfshirë inspektorët anonimë të Forbes, të njohur për sistemin e tyre të vlerësimit të bazuar vetëm në përvojë reale dhe jo në marketing.
Fituesit kryesorë të vitit 2025:
– Emirates fitoi për klasën më të mirë të parë ndërkombëtare me kabina ultra luksoze në Boeing 777-300ER, me dyer të plota, ndenjëse me pozicion “zero-gravity”, parfumet Bulgari dhe menu me kaviar, shoqëruar me shërbim personal transporti për pasagjerët.
– Qatar Airways Qsuites u shpallën klasa më e mirë ndërkombëtare e biznesit, me kabina që mund të kombinohen në dyshe apo katërshe për familje dhe grupe.
– Delta Air Lines fitoi për klasën e parë më të mirë në SHBA me kabina të reja në A321neo dhe gjithashtu për klasën më të mirë të biznesit (Delta One), me sedilje që shtrihen plotësisht dhe pajisje luksoze nga marka italiane Missoni.
– Air France, në bashkëpunim me shefin e njohur francez Daniel Boulud, mori çmimin për bashkëpunimin më të mirë kulinar gjatë fluturimit, për menutë me receta tradicionale franceze të përshtatura për kabinën.
– Air New Zealand fitoi për Inovacionin e Vitit me “Skycouch”, një sistem që shndërron tre ulëse të klasës ekonomike në një divan për fluturimet e gjata.
– Louis Vuitton Lounge by Yannick Alléno në aeroportin Hamad të Dohas u shpall salloni më i mirë i pavarur në aeroport, për dizajnin e tij elegant dhe menunë me kuzhinë franceze me ndikime nga Katari.
– Emirates First Class Lounge në Dubai fitoi si salloni më i mirë ndërkombëtar, ndërsa Delta One Lounge në aeroportin JFK në Nju Jork mori çmimin për sallonin më të mirë në SHBA, falë hapësirave relaksuese, shërbimeve të personalizuara dhe kuzhinës me menu të plotë.
– Singapore Changi Airport mori gjithashtu çmimin për ushqimin më të mirë në aeroport, me më shumë se 200 restorante që ofrojnë kuzhina nga e gjithë bota.
– American Airlines AAdvantage u shpall programi më i mirë i besnikërisë, që shpërblen udhëtarët jo vetëm për fluturimet, por edhe për blerjet në mbi 1 200 dyqane partnere.
– PS LAX, terminali privat në Los Anxhelos, fitoi për përvojën më ekskluzive private në aeroport, me siguri të dedikuar, suita private dhe transport me makina luksoze drejt avionit.
Sipas gazetarit të njohur Peter Greenberg, këto çmime përfaqësojnë një standard të besueshëm që dallon cilësinë e vërtetë nga imazhi i marketingut. “Këto vlerësime nuk janë thjesht çmime popullariteti, por një test real i shërbimit dhe përvojës që udhëtarët përjetojnë çdo ditë,” – tha ai për Forbes./skyweb.al
