Behgjet Pacolli, biznesmeni kontrovers nga Kosova, nuk ka patur një rrugë të lehtë drejt pasurimit. Pas emigrimit të tij jashtë vendit në kohën e ish Jugosllavisë, Pacolli e përfshiu veten në jo pak aventura. Fillimisht ishte ajo që njihet si Kremlingate, ku Pacolli u akuzua për korruptimin e familjes së Boris Yieltsin në këmbim të tenderave në Moskë.
Pasi mbylli çështjen Kremlingate, Pacolli u zhvendos në një tjetër shtet kleptokratik për të bërë biznes. Ky ishte Kazakistani. Falë lidhjeve të afërta që krijoi me ish udhëheqësin Nursultan Nazarbayev, Pacolli ja arriti të shtinte në dorë kontrata të majme publike në këtë shtet. Por qënia afër sulltanëve kleptokratë nuk është gjithmonë e lehtë. Dhe shpesh duhet të durosh edhe pjatat që fluturojnë kokës.
Një ngjarje e tillë është dokumentuar nga shkrimtari dhe gazetari i njohur britanik Tom Burgis në librin e tij “Kleptopia, Si paratë e pista po pushtojnë botën”.
Në librin e publikuar pesë vjet më parë, Burgis rrëfen një histori të ndodhur 30 vite më parë, mes Pacollit dhe Nazarbayevit në restorantit La Pirate, teksa presidenti kazak ishte i ftuar nga Pacolli në Monaco, bashkë me familjen e tij.
Fragment nga libri i Burgis:
“Patokh Chodiev një fisnik nga Uzbekistani dhe një produkt i shkollës prestigjioze të marrëdhënieve ndërkombëtare në Moskë, që ndiqej nga fëmijët e elitës komuniste, kishte shërbyer si diplomat para se të kalonte në biznes. Ai afrua aq shumë me Nazarbayev sa u ftua të kalojë pushimet me familjen e tij në bregdetin francez në vitin 1995. Mikpritësi i tyre ishte Behgjet Pacolli, biznesmen kosovar që peshkonte kontrata kazake. Një ditë, Pacolli kishte organizuar një darkë në një restorant afër Monakos. Kur arritën në La Pirate grupi po shikonte me plot shqetësim. Ulëse druri, blozë nga zjarri i hapur, pa kristale. Kjo nuk ishte mënyra si darkonte Kani i ditëve tona, Nazarbayev. Chodiev ishte ulur në skaj të grupit, afër derës. Kamarierët e veshur si piratë shtruan pjatat, të cilat u ngjanin enëve të burgut. “Ku dreqin na sollët?”, i bërtiti me inat Nazarbayev Pacollit. Pacolli u zverdh. Nazarbayev e kapi pjatën dhe e përplasi për tokë. Një heshtje e tmerrshme. Nazarbayev rrëmbeu edhe një pjatë tjetër dhe e hodhi. “Kjo nuk është ajo që unë e quaj pushim, ta hajë dreqi”, tha me britmë ai. Bashkëshortja e tij, Sara, ishte afër lotëve. ‘Nursultan, Nursultan qetësohu, iu lut ajo. Nëse nuk të pëlqen këtu, mund të shkojmë diku tjetër. Ndalo, të lutem dhe qetësohu. Nazarbayev nuk do të qetësohej.”
Pjese nga libri i Burgis
Pas publikimit, Pacolli nxitoi ta mohojë historinë. Sipas tij, ajo është sajuar nga një person i hidhëruar, që nuk jeton më. Por pavarësisht përgënjështrimeve të Pacollit, episodi i darkës së gabuar me pjatat që fluturuan kokës, mbetet i dokumentuar në libër.
Ky episod tregon jo pak për mënyrën se si biznesmeni kosovar e ka ngritur perandorinë e tij të biznesit. Ndërkohë bizneset e tij po rezultojnë problematike edhe në Shqipëri, teksa sherri mes Pacollit dhe ortakut të tij Valon Ademi ka futur në ngërç total aeroportin e Vlorës. /kapitali.al
