Prania e dronëve ka shkaktuar përsëri kaos në hapësirat ajrore evropiane. Aeroportet e Brukselit dhe Lièzhit në Belgjikë u mbyllën mbrëmjen e djeshme pas raportimeve për fluturim të pajisjeve të paidentifikuara, duke detyruar devijimin e disa avionëve dhe pezullimin e të tjerëve.
Sipas autoriteteve belge, një dron është vërejtur pranë aeroportit të Brukselit, çka çoi në mbylljen e menjëhershme të tij si masë sigurie. Pas rreth dy orësh ndërprerje, aeroporti u rihap për një periudhë të shkurtër, por u detyrua të mbyllet sërish pasi u raportuan përsëri prani dronësh. Ende nuk ka një afat të përcaktuar për rifillimin e fluturimeve normale.
Kompania kombëtare “Brussels Airlines” bëri të ditur se janë pezulluar 15 fluturime, ndërsa tetë të tjera janë devijuar drejt aeroporteve alternative.
Incidentet e fundit vijnë vetëm pak ditë pasi dronë janë parë edhe mbi një bazë ushtarake belge gjatë fundjavës. Ministria e Mbrojtjes e Belgjikës i cilësoi këto veprime si të “mirëorganizuara” dhe të kryera nga profesionistë që, sipas saj, kanë për qëllim destabilizimin e vendit.
Në muajt e fundit, ngjarje të ngjashme janë regjistruar edhe në vende të tjera evropiane. Në shtator, aeroporti i Kopenhagës u mbyll për katër orë, ndërsa ai i Oslos për tre orë, pas raportimeve për prani dronësh në hapësirat e fluturimeve. Autoritetet në Poloni dhe Rumani kanë shprehur gjithashtu dyshime për fluturime të mundshme dronësh rusë në territorin e tyre ajror. /Skyweb.al
