Një raport i përbashkët i Organizatës Botërore të Shëndetësisë dhe Qendrës Europiane për Parandalimin dhe Kontrollin e Sëmundjeve tregon se më shumë se gjysma e rasteve të reja me HIV në Evropë zbulohen në faza të avancuara. Shqipëria renditet ndër vendet me përqindjen më të lartë të diagnostikimit të vonë.
Sipas të dhënave të raportit, rreth 67% e rasteve të reja me HIV në vend identifikohen në një fazë të vonuar të infeksionit, çka e vështirëson nisjen e hershme të trajtimit dhe rrit rrezikun për komplikacione serioze.
Ekspertët theksojnë se diagnostikimi i vonuar lidhet kryesisht me faktin se pjesa më e madhe e infeksioneve vjen përmes kontaktit heteroseksual, një kategori që shpesh nuk e percepton veten si grup me rrezik të lartë dhe për këtë arsye teston më rrallë.
Raporti thekson se shumë nga personat që diagnostikohen vonë paraqiten me nivele të ulëta të qelizave CD4, gjë që e përkeqëson gjendjen klinike dhe kufizon mundësitë e trajtimit efektiv.
OBSH dhe ECDC bëjnë thirrje për rritje të testimeve, zgjerim të aksesit në shërbimet e depistimit përfshirë edhe vetë-testimin, si dhe përfshirje më të gjerë të grupeve që janë më pak të prira të kërkojnë shërbime shëndetësore, me qëllim uljen e diagnostikimeve të vonshme dhe përmirësimin e rezultateve të trajtimit. /Skyweb.al
