BBC i ka kushtuar një artikull të posaçëm traditave kulinare shqiptare dhe mënyrës se si ato janë ruajtur brez pas brezi. Kryeministri Edi Rama e ka ndarë artikullin në rrjetet sociale, duke theksuar se seksioni BBC Travel ka vënë në qendër agroturizmin dhe gastronominë shqiptare.
Sipas Ramës, artikulli nënvizon veçanërisht recetat tradicionale që gjyshet shqiptare kanë trashëguar ndër vite, të cilat sot janë shndërruar në një nga shtyllat kryesore të bizneseve të reja të agroturizmit në vend.
BBC rikujton periudhën e mungesave të mëdha ushqimore gjatë regjimit komunist, kohë kur shumë receta u zhdukën, si dhe ndikimin e emigracionit masiv pas viteve ’90 në humbjen e pjesës së trashëgimisë kulinare. Në artikull theksohet se Shqipëria po rikthehet te rrënjët e saj të kuzhinës falë gjysheve që transmetojnë njohuritë e tyre tradicionale te brezat e rinj.
Media britanike përshkruan dy fazat e “amnezisë kulinare” që vendi ka përjetuar gjatë 80 viteve të fundit. E para, nga viti 1946 deri më 1991, kur regjimi komunist izoloi vendin: librat e gatimit u dogjën, importet u ndaluan, udhëtimet jashtë ishin të pamundura, ushqimi u kolektivizua dhe mungesat u bënë të zakonshme. E dyta, pas rënies së komunizmit, kur rreth 710 mijë shqiptarëm afro 20% e popullsisë, emigruan në kërkim të mundësive më të mira, duke bërë që shumë receta tradicionale të harroheshin ndërsa ata përshtateshin me kulturat e reja.
Siç përfundon BBC, në fillim të shekullit XXI shumë shqiptarë brenda dhe jashtë vendit kishin humbur lidhjen me kuzhinën e tyre tradicionale, përveç grave të moshuara që arritën ta ruajnë dhe ta mbajnë gjallë këtë trashëgimi të çmuar./Skyweb.al
