Ata kanë sy të mëdhenj e të buzëqeshur, veshë që dalin përjashta dhe flasin me gëzimin llafazan të një fëmije shtatëvjeçar. Disa mbajnë fustane rozë me gërsheta; të tjerë veshin bluza blu dhe një papijon. Por këta nuk janë nipër e mbesa të zakonshme. Ata janë prej pambuku dhe metali, të fuqizuar nga inteligjenca artificiale, dhe po përdoren si një përgjigje e papritur ndaj krizës së shëndetit mendor të të moshuarve në Korenë e Jugut, shkruan CNN.
Çdo ditë, rreth 10 të moshuar në Korenë e Jugut humbin jetën përmes vetëvrasjes.
Kjo shifër, që vjen nga një raport tronditës i publikuar në qershor 2025 në Journal of the Korean Medical Association, pasqyron një prirje të vazhdueshme dhe shqetësuese në gjithë Azinë Lindore. Vende si Japonia dhe Hong Kongu prej kohësh kanë dokumentuar nivele të larta vetëvrasjesh te të moshuarit. Megjithatë, situata në Korenë e Jugut shqetëson veçanërisht autoritetet lokale, pasi vendi renditet me një nga nivelet më të larta në botën e zhvilluar dhe më i larti ndër vendet e Organizatës për Bashkëpunim dhe Zhvillim Ekonomik (OECD).
“Është një krizë e vërtetë,” thotë Othelia E Lee, profesoreshë e punës sociale në Universitetin e Karolinës së Veriut në Charlotte, e cila ka hulumtuar izolimin social te të moshuarit në Korenë e Jugut. Vendi klasifikohet si një shoqëri “super-e moshuar” dhe ka më shumë se 10 milionë njerëz të moshës 65 vjeç e lart. “Tani, ata përbëjnë një të pestën e popullsisë së vendit,” thotë Lee. “(Kjo) ndodhi aq shpejt sa qeveria koreane nuk pati kohë të krijonte një sistem të duhur pensioni dhe mbështetjeje. T’i lëshosh të përballen vetë nuk është një mundësi.”
Të moshuarit koreanë po përballen me një vështirësi të paprecedentë: transformimi i shpejtë ekonomik i vendit ka shkaktuar një ndryshim të thellë në strukturën tradicionale shoqërore. “Tani kemi më pak familje shumëbreznore dhe më pak mbështetje familjare, duke bërë që një në tre të moshuar në Korenë e Jugut të jetojë vetëm,” shpjegon Lee. “Kjo izolim sjell drejtpërdrejt vështirësi financiare, vetmi të thellë dhe ndjenjën e të qenit barrë — kushte që lidhen drejtpërdrejt me depresionin dhe vetëvrasjen.”
Ndërsa sistemi i ngarkuar i shëndetit publik përpiqet të ecë me ritmin e këtij ndryshimi shoqëror, qeveria e Koresë së Jugut është drejtuar gjithnjë e më shumë te kompanitë teknologjike për të adresuar “krizën K-elderly” dhe për të plotësuar boshllëqet kritike në fuqinë punëtore të kujdesit social. Kjo i hapi rrugën kompanive si Hyodol, një platformë e kujdesit shëndetësor me AI dhe shtëpi të zgjuar, e cila qendërzohet te një robot në formë kukulle i dhënë personave të moshuar që jetojnë vetëm. Roboti në formë kukulle lidhet me një aplikacion telefoni dhe një platformë monitorimi për familjarët ose kujdestarët. /Skyweb.al
