Një rritje e ndjeshme e rasteve të gripit, e nxitur nga një nënvariant i ri dominues i virusit, po përfshin Evropën dhe po vë nën presion të konsiderueshëm sistemet e kujdesit shëndetësor në disa vende, ka bërë të ditur Organizata Botërore e Shëndetësisë.
Sipas OBSH-së, të paktën 27 nga 38 vendet e rajonit evropian kanë raportuar aktivitet të lartë ose shumë të lartë të gripit. Në gjashtë shtete, përfshirë Irlandën, Serbinë, Slloveninë dhe Mbretërinë e Bashkuar, më shumë se gjysma e pacientëve me simptoma të gripit kanë rezultuar pozitivë.
Organizata thekson se sezoni i gripit ka nisur rreth katër javë më herët se zakonisht, një zhvillim që ka përshpejtuar rritjen e rasteve dhe ka shtuar ngarkesën mbi spitalet. OBSH u bën thirrje qytetarëve të kufizojnë transmetimin përmes vaksinimit, qëndrimit në shtëpi në rast simptomash dhe përdorimit të maskës në ambiente publike kur shfaqen shenja të infeksioneve të frymëmarrjes.
Sipas të dhënave të OBSH-së, shumica e infeksioneve në këtë sezon shkaktohen nga nënvarianti i gripit sezonal A(H3N2) K, i cili përbën deri në 90 për qind të rasteve të konfirmuara në rajonin evropian. Megjithatë, organizata sqaron se deri më tani nuk ka prova që ky nënvariant të shkaktojë forma më të rënda të sëmundjes.
Drejtori rajonal i OBSH-së për Evropën, Hans Henri Kluge, tha se sezoni aktual i gripit po tregon se edhe ndryshime të vogla gjenetike në virus mund të kenë ndikim të madh mbi sistemet shëndetësore. Ai paralajmëroi gjithashtu për rrezikun e dezinformimit, duke theksuar rëndësinë e informimit nga burime të besueshme si autoritetet kombëtare të shëndetit dhe vetë OBSH-ja.
Sipas OBSH-së, të dhënat paraprake nga Mbretëria e Bashkuar tregojnë se vaksina kundër gripit ka ulur rrezikun e sëmundjeve të rënda nga nënvarianti A(H3N2), edhe pse mund të mos parandalojë plotësisht infektimin. Organizata nënvizon se vaksinimi mbetet masa më e rëndësishme parandaluese, veçanërisht për të moshuarit, personat me sëmundje kronike, gratë shtatzëna, fëmijët dhe punonjësit e kujdesit shëndetësor.
OBSH thekson se fëmijët në moshë shkollore janë përhapësit kryesorë të gripit në komunitet, ndërsa shumica e rasteve të rënda që kërkojnë shtrim në spital regjistrohen tek personat mbi 65 vjeç. Sipas parashikimeve, kulmi i sezonit të gripit pritet në fund të dhjetorit ose në fillim të janarit.
Kluge sqaroi se, ndonëse sezoni aktual është i rëndë, ai nuk përfaqëson një emergjencë globale si pandemia e Covid-19. Ai theksoi se sistemet shëndetësore kanë përvojë të gjatë në menaxhimin e gripit dhe se ekzistojnë vaksina të sigurta dhe masa mbrojtëse të provuara.
Ndërkohë, Shërbimi Shëndetësor Kombëtar i Britanisë ka paralajmëruar se po përgatitet për një nga dimrat më të vështirë të regjistruar ndonjëherë, për shkak të presionit në rritje mbi klinikat, spitalet dhe shërbimet e ambulancës. Edhe Instituti Robert Koch në Gjermani ka njoftuar se sezoni i gripit ka nisur dy deri në tre javë më herët se zakonisht. /skyweb.al
