Përgatitjet e atletëve amerikanë për Lojërat Olimpike të Dimrit përfshijnë jo vetëm stërvitjen, por edhe kujdesin për shëndetin gjatë udhëtimeve ajrore. Dr. Jonathan Finnoff, mjeku kryesor i Komitetit Olimpik dhe Paraolimpik të Shteteve të Bashkuara, ka ndarë disa këshilla praktike për shmangien e sëmundjeve gjatë fluturimeve.
Sipas tij, zgjedhja e vendit në avion ka rëndësi. Ai rekomandon që udhëtarët të ulen pranë dritares dhe në mes të kabinës, për të kufizuar kontaktet me pasagjerët që kalojnë në korridor dhe për të reduktuar rrezikun e ekspozimit ndaj mikrobeve që qarkullojnë në ajër.
Një tjetër këshillë thelbësore është përdorimi i pecetave dezinfektuese për të pastruar sipërfaqet që preken shpesh, si tavolina e ngrënies, rripi i sigurimit dhe mbështetëset e krahëve.
Studimet kanë treguar se këto zona janë shpesh më të ndotura se tualetet e avionit.
Dr. Finnoff thekson gjithashtu se gjumë i mjaftueshëm është mënyra më e mirë për të forcuar imunitetin dhe për të shmangur infeksionet gjatë udhëtimeve të gjata. Ai këshillon të paktën 7 deri në 8 orë gjumë në natë para dhe pas fluturimeve.
Sipas tij, edhe pse pandemia globale është zhdukur, udhëtimet me avion mbeten një sfidë për shëndetin. Por me disa masa të thjeshta higjienike dhe kujdes personal, rreziku për t’u sëmurë mund të ulet ndjeshëm, si për sportistët profesionistë, ashtu edhe për udhëtarët e zakonshëm. /skyweb.al
