Biznesmeni Rrok Gjoka, i njohur në sektorin e infrastrukturës si “biznesmeni i tuneleve”, pritet të japë llogari në Prokurorinë e Posaçme në kuadër të një hetimi që lidhet me projektet e mëdha rrugore në vend, përfshirë tunelin e Llogarasë dhe atë të Rrugës së Arbrit.
Sipas gazetarit Elton Qyno, hetimi ka hyrë në një fazë më intensive dhe përfshin një numër të madh emrash nga sektori i ndërtimit dhe kontraktorëve të projekteve publike.
Përveç Gjokës, pritet të dëshmojnë edhe disa nga figurat më të njohura të industrisë, mes tyre Ilir Shtufi, Pëllumb Salillari dhe Ardit Metaliaj.
Në listën e personave që do të thirren nga SPAK për të dhënë shpjegime për projektet infrastrukturore përfshihen gjithashtu Sadik Ismailaj i kompanisë “Alb-Star”, Gëzim Dani, Paqsor Buzi, Ylli Senka, Kujtim Arifaj dhe një sërë biznesmenësh të tjerë që kanë pasur rol në kontrata apo nënkontrata të lidhura me këto investime.
Mësohet se në ditët në vijim pritet të paraqiten edhe emra të tjerë si Bledar Starova, Eduart Çohadari, Iljan Metaliaj, Çuman Sejdiaj, Gramos Dalipi, Bledar Lloshi, Giovanni Pascale, Vladimir Pjetërgjokaj, Enea Kaçi, Basri Troci, Besmir Çako, Ervis Toska, Ergys Senka, Spartak Demiraj, Leonard Proko, Arbër Abazi dhe Artan Sako.
Hetimet po fokusohen në mënyrën e realizimit të projekteve, procedurat kontraktore dhe flukset financiare që lidhen me këto investime të mëdha publike.
SPAK synon të verifikojë nëse gjatë zbatimit të tyre ka pasur shkelje, favorizime apo elementë të tjerë që mund të përbëjnë vepër penale. /skyweb.al
