Ministri gjerman i Kulturës, Wolfram Weimer, ka propozuar që platforma e rrjeteve sociale TikTok, aktualisht në pronësi të kompanisë kineze ByteDance, të kalojë në duart e kompanive evropiane. Ai ngriti shqetësime lidhur me sovranitetin e të dhënave dhe kontrollin mbi informacionin e përdoruesve.
Gjatë një paneli në një konferencë editoriale të organizuar nga Deutsche Presse-Agentur (dpa), Weimer tha se Evropa duhet të shtrojë të njëjtën pyetje që kanë ngritur edhe SHBA-të: kush e zotëron TikTok-un dhe a duhet që pronësia e tij të kalojë tek aktorë evropianë, përmes një marrëveshjeje me ByteDance.
Sipas tij, platforma të tilla kanë akses në një sasi të dhënash që një brez më parë do të ishte e paimagjinueshme, përfshirë informacione shumë personale të miliona përdoruesve. Për këtë arsye, ai theksoi se autoritetet evropiane nuk duhet të lejojnë që këto të dhëna të përfundojnë sistematikisht në duart e një shteti tjetër.
Debati për TikTok-un është intensifikuar pas masave të ndërmarra në Shtetet e Bashkuara të Amerikës, ku një ligj i vitit 2024 detyroi ByteDance të shiste operacionet amerikane të aplikacionit ose të përballej me ndalimin e tij. Muajin e kaluar, biznesi amerikan i TikTok-ut u transferua në një sipërmarrje të përbashkët të krijuar rishtazi, ndërsa ByteDance mban tashmë një pjesëmarrje nën 20% në njësinë TikTok USDS. Afati përfundimtar ishte shtyrë disa herë nga presidenti Donald Trump.
Përtej çështjes së pronësisë, Weimer ka propozuar edhe vendosjen e një takse për gjigantët e teknologjisë si Google dhe Meta Platforms, kompania mëmë e Facebook. Sipas planit të tij, këto kompani do të paguanin 10% të të ardhurave nga reklamat në Evropë, me synimin për të balancuar fitimet e mëdha që realizojnë falë dominimit në tregun evropian.
