Autoriteti Kombëtar i Ushqimit ka ndërhyrë pas zbulimit të sasive të larta të pesticideve në fruta të importuara nga Greqia dhe Italia, konkretisht pjeshkë dhe rrush i kuq francez. Sipas analizave laboratorike të kryera nga AKU, në pjeshkat e importuara është konstatuar prania e pesticidit Phosmet në nivele që tejkalojnë kufirin e lejuar. Po ashtu, në ngarkesën me rrush të kuq është gjetur lënda Propamocarb, e cila rezulton të jetë në përqindje të papranueshme për konsum.
AKU thekson se ka marrë masa për të mbrojtur shëndetin e konsumatorëve. Janë bllokuar sasi të konsiderueshme të këtyre produkteve, të cilat ndodheshin në magazinat e subjekteve, ndërsa është urdhëruar kthimi i produkteve të shpërndara. Paralelisht, janë nisur procedurat për asgjësimin e frutave të kontaminuara.
AKU ka njoftuar gjithashtu Rrjetin Europian të Sigurisë Ushqimore (RASFF) për rastin, duke ngritur alarmin për importet e tjera që mund të jenë të prekura nga nivele të ngjashme të larta të pesticideve. Ky rast ngre shqetësime serioze për sigurinë ushqimore në vend dhe nevojën për kontrolle më të rrepta në pikat kufitare dhe tregun vendas. /Skyweb.al
