Nisi sot puna për demontimin e urës së Dragostunjës në zonën e njohur si “Arrat e Gurrës”, në aksin kombëtar Librazhd–Prrenjas, pasi struktura u dëmtua rëndë nga rrëshqitja dhe fundosja e tokës.
Ndërhyrja u bë e domosdoshme pasi ekspertët konfirmuan se ura nuk mund të riparohej dhe paraqiste rrezik për sigurinë publike.
Sipas specialistëve në terren, një lëvizje e fuqishme e masivit të dheut destabilizoi themelet, duke shkaktuar zhvendosje të trupit të rrugës dhe çarje të shtresave mbajtëse.
Këto dëmtime e nxorën plotësisht jashtë funksionit strukturën ekzistuese.
Procesi i demontimit po kryhet me mjete të rënda dhe nën masa të shtuara sigurie për shkak të paqëndrueshmërisë së terrenit.
Autoritetet theksojnë se zona vijon të mbetet me risk të lartë gjeologjik, ndërsa në disa segmente raportohen ende lëvizje aktive të tokës.
Shembja e urës ka rënduar situatën e qarkullimit në këtë aks të rëndësishëm, duke detyruar devijimin e trafikut në rrugë alternative rurale që nuk përballojnë fluksin e lartë të automjeteve dhe duke krijuar vështirësi për komunitetet përreth.
Institucionet përgjegjëse pritet të hartojnë projektin për ndërtimin e një ure të re, të projektuar sipas kushteve gjeologjike të zonës.
Banorët kërkojnë qartësi për afatet dhe garanci që ndërhyrja e re të ofrojë një zgjidhje të qëndrueshme dhe afatgjatë. /skyweb.al
