Këshilli Mbikëqyrës i Bankës së Shqipërisë vendosi sot të mbajë të pandryshuar normën bazë të interesit në nivelin 2.5%. Guvernatori Gent Sejko theksoi se, deri në tremujorin e parë të 2025, ekonomia ka shfaqur ecuri pozitive, por konflikti në Lindjen e Mesme paraqet “burim ekstrem rreziku dhe efektet e tij janë të vështira për t’u parashikuar”.
“Konflikti ushtarak dhe tensionet gjeopolitike në Lindjen e Mesme janë një burim ekstrem rreziku dhe pasigurie mbi ekonominë botërore dhe atë shqiptare. Ky konflikt ka sjellë një rritje të shpejtë e të fortë të çmimit të naftës dhe të produkteve të tjera energjetike në tregjet botërore. Kohëzgjatja, intensiteti dhe kanalet indirekte të transmetimit të kësaj goditjeje në ekonominë shqiptare janë të vështira për tu vlerësuar me një shkallë të pranueshme sigurie,” tha Sejko.
Ai shtoi se zgjatja dhe intensifikimi i konfliktit mund të shndërrohet në një goditje serioze oferte, të krahasueshme me atë që pasoi nisjen e luftës në Ukrainë në vitin 2022. “Në ngjashmëri me këtë episod, kjo goditje do të kishte pasoja negative në inflacion dhe në rritjen ekonomike të vendit. Reagimi i politikës monetare do të vijojë të orientohet drejt respektimit të objektivit të stabilitetit të çmimeve, duke u kujdesur që goditja e ofertës të mos shndërrohet në presione të qëndrueshme dhe afatgjata inflacioniste.”
Në lidhje me ecurinë ekonomike, Sejko vuri në dukje: “Ekonomia shqiptare ka shfaqur ecuri pozitive, mbështetur nga rritja e konsumit familjar, e investimeve të sektorit privat, dhe e eksportit të shërbimeve.” Ai shtoi se politika fiskale ka vijuar të jetë konsoliduese, ndërsa eksporti i mallrave ka shënuar rënie, duke nxitur zgjerimin e sektorëve të shërbimeve dhe ndërtimit, ndërsa bujqësia dhe industria kanë vazhduar të tkurren.
“Punësimi në sektorin privat jo-bujqësor u rrit me 5.6% gjatë vitit 2025, paga mesatare u rrit me 8.5%, ndërsa norma e papunësisë në fund të vitit qëndroi në një nivel të ulët historik prej 8.3%. Rritja e shpejtë e pagave nuk është përcjellë e plotë në rritje të çmimeve, si pasojë e absorbimit të saj nga rritja e produktivitetit dhe reduktimi i marzhit të fitimit të bizneseve,” tha Guvernatori.
Ai theksoi gjithashtu rolin e politikës monetare: “Lehtësimi i qëndrimit të politikës monetare gjatë vitit 2025 solli një ulje të mëtejshme të normave të interesit të kredive dhe u pasqyrua në një rritje të qëndrueshme e të shpejtë të saj. Po ashtu, prezenca e shtuar e Bankës së Shqipërisë në tregun e brendshëm valutor tërhoqi një pjesë të ofertës së shtuar të valutës, duke mundësuar një nivel më të qëndrueshëm të kursit të këmbimit. Për rrjedhojë, tregjet financiare vijojnë të karakterizohen nga likuiditet i bollshëm, norma të ulëta interesi dhe bilance të shëndosha të sektorit bankar.”
Sejko përfundoi: “Kushtet e favorshme të financimit kanë mbështetur zgjerimin e konsumit dhe të investimeve të sektorit privat. Rritja e kredisë bankare ka vijuar të kontribuojë pozitivisht në rritjen ekonomike. Materializimi i goditjeve të ofertës do të kërkojë masa të kujdesshme monetare e fiskale, të cilat duhet të prioritizojnë ruajtjen e stabilitetit ekonomik dhe mbrojtjen e segmenteve më vulnerabël të ekonomisë e shoqërisë.”
