Një konflikt pronësie brenda një familjeje ka përfunduar në Gjykatën e Tiranës, ku po shqyrtohet një çështje civile për rreth 15,800 m² tokë bujqësore në zonën e Daiasit, në Njësinë Administrative Petrelë.
Sipas dosjes gjyqësore që ka konsultuar skyweb.al, paditëse në këtë çështje janë Danjela Guxha, Levana Teqja, Vida Guxha, Adelina Guxha, Fiqiri Guxha, Vaje Guxha dhe Qanije Guxha, të cilat kërkojnë njohjen e tyre dhe të pjesëtarëve të tjerë të familjes si pronarë të tokës bujqësore, si dhe çregjistrimin dhe regjistrimin e pasurive në emër të familjes së tyre.
Në anën tjetër, të paditur janë Bujar Guxha, Ibrahim Kruja, Russel Grant Van Cleve dhe shoqëria “Vista group” shpk, e përfaqësuar nga Ibrahim Kruja dhe Russel Grant Van Cleve.
Objekti i padisë lidhet me njohjen e pronësisë mbi disa parcela toke me sipërfaqe totale mbi 1.5 hektarë, të ndodhura në Daias, për të cilat paditëset pretendojnë se janë përfituar dhe regjistruar në mënyrë të padrejtë.
Sipas pretendimeve të ngritura në gjyq, konflikti ka lindur për shkak të dyshimeve se toka është zaptuar përmes dokumenteve të falsifikuara dhe në bashkëpunim me një prej anëtarëve të familjes.
Po ashtu, në këtë zonë rezulton se janë ndërtuar vila, çka ka shtuar tensionet mes palëve dhe ka përshkallëzuar konfliktin.
Në këtë proces është përfshirë edhe ndërtuesi Ibrahim Kruja, i cili rezulton një nga të paditurit kryesorë në këtë çështje pronësie.
Kruja ka qenë më herët në qendër të vëmendjes edhe për një rast tjetër, pasi vitin e kaluar u arrestua në zonën Korçë–Voskopojë për ndërtim pa leje. Sipas autoriteteve, ai dyshohej se kishte ngritur bazamente betoni për objekte ndërtimi pa u pajisur me dokumentacionin përkatës.
Ndërkohë, në këtë çështje civile në Tiranë, fokusi mbetet te verifikimi i titujve të pronësisë dhe ligjshmëria e regjistrimit të pasurive, ndërsa palët vijojnë përplasjen në gjykatë për një sipërfaqe toke me vlerë të konsiderueshme.
Çështja është në proces shqyrtimi dhe pritet të zbardhë më tej mënyrën se si janë administruar dhe regjistruar këto prona ndër vite. /skyweb.al
