Kostot e ndërtimit në Shqipëri po shfaqin shenja stabilizimi, madje në disa kategori materialesh kanë nisur të bien, por çmimet e apartamenteve vijojnë të mbeten në nivele rekord.
Sipas të dhënave të publikuara nga INSTAT, Indeksi i Kushtimit në Ndërtim për Banesa arriti në 114.4 në tremujorin e parë të vitit 2026, ndërsa rritja vjetore ishte vetëm 1.1%. Një vit më parë, kjo rritje ishte 1%. Kjo tregon se ritmi i shtrenjtimit të ndërtimit është ngadalësuar ndjeshëm krahasuar me periudhën pas pandemisë dhe krizës së çmimeve.
Interesant është fakti se grupi “Shpenzime materiale”, që përfaqëson një nga kostot kryesore të ndërtimit, ka shënuar ulje me 0.9% në krahasim me një vit më parë. Brenda këtij grupi, materialet e ndërtimit kanë pësuar ulje me 1.4%, ndërsa materialet hidrosanitare dhe të ventilimit janë ulur me 0.9%.
Në të njëjtën kohë, grafiku i INSTAT tregon se rritja vjetore e kostove të ndërtimit ka rënë vazhdimisht nga mbi 5% në fillim të vitit 2023 në vetëm 1.1% në tremujorin e parë të vitit 2026.
Megjithatë, kjo nuk po reflektohet në tregun e pasurive të paluajtshme.
Në Tiranë dhe në zonat kryesore turistike, çmimet e apartamenteve vijojnë të rriten ose të qëndrojnë në nivele shumë të larta, pavarësisht se një pjesë e kostove të ndërtimit nuk po rriten më me ritmet e viteve të kaluara.
Ekspertët e tregut e lidhin këtë fenomen me disa faktorë, ku përfshihen kërkesa e lartë për banesa, investimet në pasuri të paluajtshme, mungesa e ofertës në zonat më të kërkuara dhe pritshmëritë e zhvilluesve për fitime të larta.
Kjo krijon një paradoks në treg: ndërsa kostot e ndërtimit po stabilizohen dhe disa materiale po bëhen më të lira, çmimet e shitjes së apartamenteve nuk po ndjekin të njëjtin drejtim.
Megjithatë, duhet theksuar se taksat janë rritur, si edhe kostoja e korrupsionit mbetet një element që vazhdon të mbajë të larta kostot e ndërtimit në vend.
