Gazetarja Ornela Gaçe, e njohur për qëndrimet e saj në mbështetje të turizmit shqiptar, ka denoncuar gjendjen e plazhit publik në Livadh të Himarës.
Sipas saj, plazhi publik jo vetëm nuk pastrohet nga institucionet, por çdo vit po ngushtohet më shumë për shkak të hapësirave që u jepen privatëve nga Bashkia Himarë.
Denoncimi vjen në një kohë kur kryeministri Edi Rama deklaroi para nisjes së sezonit se këtë vit nuk do të kishte plazhe private, përveç rasteve të lidhura me strukturat hoteliere.
Megjithatë, sipas denoncimit, në Livadh situata duket ndryshe, pasi një pjesë e madhe e vijës bregdetare është zënë nga subjekte private.
“Këtu plazhi publik jo vetëm që nuk pastrohet fare, dhe e pastrojmë ne që jemi pushues ndër vite këtu, por këtë vit është edhe më i vogël. Këtu hapësira e dhënë me qira, sepse janë individë që marrin nga dy-tre hapësira, i është lënë një hapësirë shumë e vogël plazhit publik”, tha Ornela Gaçe.
Ajo shtoi se plazhi publik është shumë i papastër dhe nuk mirëmbahet.
“Po flasim që ta rregullojmë këtë plazh”, tha Gaçe, duke theksuar se hapësira publike këtë vit është “shumë, shumë më e vogël. Nuk ka as dy gisht për plazhin publik”, u shpreh ajo.
Problematika lidhet edhe me mënyrën se si është bërë ndarja e plazheve të dhëna me qira në Bashkinë e Himarës, e cila ka zbatuar logjikën e klientelizmit dhe jo të shfrytëizmit të hapësirave ku edhe privati të bëjë biznes, por edhe qytetari që s’do të paguajë çadër të ketë mundësi zgjedhjeje.
Gjatë ditëve të fundit, plazhet e Himarës janë përballur edhe me ndotje, përfshirë mbetje të dyshuara fekale nga tubat e shkarkimit dhe ndotje me naftë, që dyshohet se është hedhur nga anije.
Ndërkohë kryebashkiaku Vangjel Tavo mban të mbyllur derën e informacionit të bashkisë për problematika të ndryshme për gazetarët që nuk i bien violinës sipas melodisë që ai do të dëgjojë duke vijuar me praktikat e një menaxhimi prej feudali të pushtetit. /skyweb.al
