Durrësi rezulton qarku me nivelin më të lartë të motorizimit në Shqipëri, ndërsa numri i makinave elektrike ka shënuar një rritje të fortë gjatë vitit 2025.
Sipas të dhënave të INSTAT-it, Durrësi kishte 535 autovetura për çdo 1,000 banorë, duke lënë pas Tiranën dhe qarqet e tjera të vendit.
Ndërkohë, Tirana vijon të ketë numrin më të madh të mjeteve në total, duke përqendruar 34.7% të të gjitha mjeteve rrugore të regjistruara në vend.
Raporti tregon gjithashtu një rritje të shpejtë të automjeteve elektrike. Numri i tyre u shtua me 91.2% krahasuar me vitin 2024, duke u afruar me dyfishimin brenda vetëm një viti.
Grafiku i INSTAT-it tregon se rritja është përshpejtuar veçanërisht pas vitit 2023, kur përdorimi i makinave elektrike nisi të zgjerohej me ritme më të forta.
Megjithatë, automjetet me naftë vijojnë të dominojnë tregun shqiptar, duke përbërë 72.1% të totalit të autoveturave.
Të dhënat sinjalizojnë se, krahas rritjes së numrit të përgjithshëm të makinave, në Shqipëri po ndryshon gradualisht edhe struktura e parkut rrugor, me një prani gjithnjë e më të madhe të automjeteve elektrike.
