Kompanitë që kanë marrë pjesë në marrëveshje të fshehta për çmimet, ndarjen e tregut, kufizimin e prodhimit apo manipulimin e tenderëve mund t’i shpëtojnë plotësisht ose pjesërisht gjobës, nëse bashkëpunojnë me Autoritetin e Konkurrencës.
Sipas udhëzimit të miratuar me vendimin nr. 1317, datë 17 gusht 2026, ndërmarrja e parë që zbulon pjesëmarrjen e saj në një kartel dhe dorëzon prova vendimtare mund të përfitojë imunitet të plotë nga gjoba.
Përfitimi jepet kur informacioni i dorëzuar i mundëson Autoritetit të kryejë një kontroll të posaçëm ose të provojë shkeljen, në një kohë kur institucioni nuk disponon ende prova të mjaftueshme.
Kompania duhet të tregojë pjesëmarrësit, produktet ose shërbimet e prekura, mënyrën e funksionimit të marrëveshjes, takimet, datat, shtrirjen gjeografike dhe kohëzgjatjen e kartelit. Ajo duhet të dorëzojë gjithashtu dokumentet dhe provat që ka në dispozicion.
Për të ruajtur vendin në radhën e aplikimeve, kompania mund të kërkojë një “marker”. Ky mekanizëm i rezervon përkohësisht pozicionin, por aplikimi duhet të plotësohet brenda afatit të vendosur nga Autoriteti.
Kompanitë që aplikojnë më vonë nuk përfitojnë imunitet të plotë, por mund të marrin ulje të gjobës nëse sjellin prova me “vlerë të shtuar të konsiderueshme”:
- Kompania e parë pas aplikantit për imunitet: ulje 30–50%;
- Kompania e dytë: ulje 20–30%;
- Kompanitë e tjera: ulje deri në 20%.
Aplikimet do të trajtohen sipas rendit të paraqitjes. Provat e krijuara në kohën kur ka funksionuar karteli dhe dokumentet që lidhen drejtpërdrejt me shkeljen do të kenë më shumë peshë sesa deklaratat e mëvonshme.
Për të përfituar, kompania duhet të bashkëpunojë plotësisht dhe vazhdimisht, të mos fshehë apo falsifikojë prova dhe të ndërpresë pjesëmarrjen në kartel. Ndërmarrja që ka detyruar kompani të tjera të bëhen pjesë e marrëveshjes nuk mund të përfitojë imunitet të plotë, por mund të kërkojë ulje të gjobës.
Imuniteti vlen vetëm për gjobën që do të vendoste Autoriteti i Konkurrencës dhe nuk përbën automatikisht mbrojtje nga përgjegjësi të tjera ligjore.
