Shqipërisë do t’i nevojiten rreth 8.4 miliardë euro gjatë dekadës së ardhshme për t’u përshtatur me pasojat e ndryshimeve klimatike.
Shifra del nga dokumenti i ri i Kontributit Kombëtar të Përcaktuar, i miratuar nga qeveria dhe botuar në Fletoren Zyrtare, i cili mbështetet te Plani Kombëtar i Përshtatjes 2026–2036.
Në total parashikohen 66 masa me një kosto prej 9.8 miliardë dollarësh, ose afërsisht 8.4 miliardë euro.
Faturën më të madhe e ka zhvillimi urban, me rreth 2.72 miliardë dollarë, i ndjekur nga pyjet dhe kullotat me 2.13 miliardë dollarë. Për transportin parashikohen rreth 2.04 miliardë dollarë, ndërsa masat në sektorin e energjisë llogariten në rreth 1.96 miliardë dollarë.
Bujqësia kërkon rreth 678 milionë dollarë, ndërsa masat ndërsektoriale rreth 257 milionë dollarë.
Shpenzimet nuk do të shpërndahen në mënyrë të barabartë gjatë gjithë periudhës.
Sipas dokumentit, fatura vjetore pritet të arrijë kulmin në vitet 2033–2035, kur investimet e nevojshme parashikohen të kalojnë 1.2 miliardë dollarë në vit.
Masat përfshijnë mbrojtjen e qyteteve dhe infrastrukturës, përshtatjen e bujqësisë, menaxhimin e pyjeve dhe zjarreve, mbrojtjen e bregdetit, energjinë dhe transportin. Dokumenti vlerëson se sektorët urbanë, bujqësia dhe turizmi janë ndër më të ekspozuarit ndaj rreziqeve të ardhshme klimatike. /skyweb.al
