Vetëm 5 nga 46 kandidatët e riregjistruar kanë kaluar me sukses testimin për rifitimin e lejes së drejtimit në sesionin e fundit.
Të dhënat janë bërë publike nga Drejtoria e Përgjithshme e Shërbimeve të Transportit Rrugor, e cila thekson se procesi i rifitimit të patentës nuk është i lehtë për drejtuesit që i nënshtrohen ritestimit.
Nga nisja e fushatës në qershor të vitit 2022, janë riregjistruar në total 3,573 kandidatë.
Vetëm 496 prej tyre kanë arritur ta kalojnë testimin dhe të rifitojnë lejen e drejtimit, duke përfaqësuar 13.8% të numrit të përgjithshëm.
Kjo do të thotë se më shumë se 86% e kandidatëve të regjistruar nuk kanë arritur ta rifitojnë patentën gjatë këtij procesi.
DPSHTRR u bën thirrje kandidatëve të përgatiten përmes burimeve zyrtare, duke përdorur platformën online të simulimit të provimit dhe aplikacionin “Leje Drejtimi”.
Sipas institucionit, ritestimi synon rikthimin në qarkullim të drejtuesve më të përgatitur dhe më të përgjegjshëm, pas verifikimit të njohurive të tyre mbi rregullat e trafikut rrugor.
