Presidenti i Republikës, Bajram Begaj, mori pjesë këtë të shtunë në manifestimin “Mirë se vini në Alpet Shqiptare – Vuthaj 2026”, ku vlerësoi rolin e këtij aktiviteti në forcimin e lidhjeve të shqiptarëve me vendlindjen, ruajtjen e identitetit kombëtar dhe bashkimin e brezave.
Në fjalën e tij, Kreu i Shtetit e cilësoi zonën e Alpeve Shqiptare si një pjesë të rëndësishme të historisë dhe kulturës shqiptare, duke theksuar se aty janë ruajtur tradita, zakone dhe mënyra jetese që përbëjnë një pasuri të vyer kombëtare.
Begaj u ndal edhe te kontributi i shqiptarëve të Plavës dhe Gucisë në mbrojtjen e gjuhës, kulturës dhe identitetit kombëtar, duke e cilësuar këtë trevë si një vatër historike të qëndresës, arsimit dhe atdhetarisë. Ai përmendi figura të njohura si Ali Pashë Gucia dhe Jakup Ferri, si pjesë e trashëgimisë historike të zonës.
Presidenti theksoi se shqiptarët sot jetojnë në një periudhë me më shumë mundësi, falë paqes, procesit të integrimit evropian dhe partneritetit strategjik me Shtetet e Bashkuara të Amerikës.
Në mesazhin e tij drejtuar pjesëmarrësve, veçanërisht shqiptarëve të diasporës, Begaj bëri thirrje për ruajtjen e trashëgimisë kombëtare dhe forcimin e unitetit.
“Të ruajmë atë që kemi trashëguar, por njëkohësisht të ndërtojmë me besim të ardhmen; të jemi krenarë për identitetin tonë, por edhe të hapur ndaj bashkëpunimit; të mbështesim njëri-tjetrin dhe të punojmë që brezat që vijnë të kenë më shumë mundësi se ne”, u shpreh ai.
Gjatë ceremonisë, Presidenti Begaj u nderua me çmimin “Krenaria e Alpeve Shqiptare”, në vlerësim të kontributit të tij në mbrojtjen e interesave kombëtare dhe mbështetjen e shqiptarëve kudo që jetojnë.
Në kuadër të vizitës në Plavë dhe Guci, Kreu i Shtetit zhvilloi gjithashtu takime me përfaqësues të komunitetit shqiptar dhe autoritetet lokale.
