Ministria e Arsimit ka hartuar një udhëzues për përdorimin e inteligjencës artificiale në shkolla, përmes mjeteve si ChatGPT, Gemini dhe Full Fact. Dokumenti përcakton se teknologjia duhet të mbështesë, por jo të zëvendësojë, aftësitë dhe vendimmarrjen njerëzore.
Sipas udhëzuesit të publikuar nga Agjencia e Sigurimit të Cilësisë së Arsimit Parauniversitar, mësuesit mund ta përdorin IA-në për hartimin e materialeve mësimore, ushtrimeve, pyetjeve, kuizeve dhe provimeve.
Teknologjia mund të shërbejë edhe për krijimin e kritereve të vlerësimit dhe komenteve orientuese për nxënësit në lëndë të ndryshme, nga gjuha shqipe, gjuhët e huaja dhe matematika deri te artet dhe edukimi fizik.
IA-ja mund të përdoret gjithashtu për planifikimin e orëve mësimore, përkthimin e teksteve, korrigjimin e gabimeve gjuhësore dhe përgatitjen e detyrave me nivele të ndryshme vështirësie, sipas nevojave të nxënësve.
Megjithatë, çdo vlerësim i prodhuar me ndihmën e inteligjencës artificiale duhet të kontrollohet nga mësuesi, i cili ruan përgjegjësinë përfundimtare për saktësinë dhe përshtatshmërinë e tij.
Udhëzuesi synon që edhe nxënësit ta përdorin IA-në për kërkimin e informacionit, realizimin e projekteve dhe zhvillimin e kreativitetit. Dokumenti paralajmëron, ndërkohë, për rrezikun e dezinformimit, varësisë digjitale, cenimit të privatësisë dhe përdorimit joetik të materialeve të gjeneruara.
Një vëmendje e veçantë i kushtohet plagjiaturës. Përdorimi i IA-së për të kuptuar një koncept, për të marrë sugjerime ose për të përmirësuar një draft konsiderohet i pranueshëm, ndërsa kopjimi i drejtpërdrejtë i përgjigjeve cenon integritetin akademik.
Për këtë arsye, mësuesit orientohen t’u kërkojnë nxënësve të shpjegojnë edhe procesin e punës dhe jo vetëm të dorëzojnë produktin përfundimtar.
