Një emër në internet mund të kushtojë sa një ndërtesë luksoze, edhe pa pasur pas tij zyra, pajisje apo një biznes funksional. Në tregun e domeneve, vetëm disa shkronja mund të shiten për dhjetëra milionë euro.
Një nga shembujt më të bujshëm është AI.com, i blerë në vitin 2025 nga bashkëthemeluesi i Crypto.com, Kris Marszalek, për 70 milionë dollarë. Shifra u konfirmua nga ndërmjetësi i marrëveshjes, duke e cilësuar shitjen më të madhe të një domeni të bërë publike.
Më herët, në maj 2019, kompania amerikane MicroStrategy shiti Voice.com për 30 milionë dollarë. Blerësi, Block.one, pagoi për emrin e adresës, jo për ndonjë infrastrukturë fizike.
Domeni është emri që shkruajmë për të hyrë në një faqe interneti. Vlera e tij lidhet me faktin se një adresë e caktuar mund të regjistrohet vetëm nga një mbajtës në të njëjtën kohë. Nëse një kompani kërkon pikërisht atë emër, duhet të negociojë me atë që e ka regjistruar.
Emrat e shkurtër, që mbahen mend lehtë dhe lidhen drejtpërdrejt me një shërbim, janë veçanërisht të kërkuar. Adresa si Hotels.com apo Insurance.com tregojnë menjëherë çfarë mund të gjejë përdoruesi dhe kanë potencial për t’u kthyer në marka të njohura.
Rreth tyre është krijuar një treg rishitjeje, ku investitorët regjistrojnë ose blejnë emra me shpresën se më vonë do t’i shesin më shtrenjtë. Megjithatë, shumica e domeneve nuk vlejnë miliona dhe mund të mos gjejnë fare blerës.
Në fund të tremujorit të dytë të vitit 2026, në botë numëroheshin 401.6 milionë domene të regjistruara, me rritje vjetore prej 8.1%. Vetëm adresat me prapashtesën .com arrinin në 166.6 milionë.
Bumi i inteligjencës artificiale ka sjellë fitime edhe për Anguillën, territorin britanik në Karaibe të cilit i përket prapashtesa .ai. Regjistrimet u rritën nga 144 mijë në vitin 2022 në 354 mijë më 2023. Atë vit, të ardhurat nga këto adresa arritën rreth 32 milionë dollarë, mbi një të pestën e të ardhurave të qeverisë.
Tregu ka edhe përplasje për emrat që shfrytëzojnë markat tregtare. Në vitin 2025, Organizata Botërore e Pronësisë Intelektuale trajtoi mbi 6,200 çështje për domene, numri më i lartë i regjistruar prej saj.
Edhe një adresë e blerë për miliona duhet të rinovohet. Mbajtësi ruan të drejtën e përdorimit për aq kohë sa regjistrimi mbetet aktiv.
