Kursi i këmbimit euro-lek ka shënuar një minimum të ri historik në prag të festave të fundvitit. Sipas kursit zyrtar të publikuar nga Banka e Shqipërisë, një euro u këmbye sot me 96.46 lekë, niveli më i ulët i regjistruar ndonjëherë.
Agjentët e këmbimit valutor shpjegojnë se në ditët e fundit në treg është vërejtur një ofertë e shtuar e valutës së huaj, një fenomen që lidhet kryesisht me faktorë sezonalë. Kthimi i emigrantëve për festat e fundvitit sjell flukse më të larta të euros në treg, duke ushtruar presion rënës mbi kursin.
Pavarësisht këtij rekordi të ri, rënia vjetore e euros ndaj lekut mbetet më e moderuar krahasuar me vitet e mëparshme. Krahasuar me të njëjtën periudhë të vitit të kaluar, kursi euro-lek rezulton në rënie me rreth 2.1 për qind.
Sipas vlerësimeve, stabilizimi relativ i kursit gjatë këtij viti nuk lidhet vetëm me mekanizmat e tregut, por edhe me ndërhyrjet e Bankës së Shqipërisë, të cilat kanë ndikuar në zbutjen e luhatjeve dhe në ruajtjen e një ecurie më të kontrolluar të kursit të këmbimit. /skyweb.al
