Biznesmeni Dionis Teqja, pronar i disa prej kompanive më të mëdha në Shqipëri dhe i njohur gjerësisht si një nga aksionerët kryesorë të qendrës tregtare “Megatek”, rezulton prej më shumë se tre javësh i paarritshëm nga drejtësia shqiptare. Gjykata e Tiranës ka dështuar ta njoftojë atë për një proces civil në të cilin është palë e paditur, duke u detyruar të përdorë mekanizmin e shpalljes publike.
Bëhet fjalë për një çështje civile mes aksionerëve të një prej kompanive ku Teqja është ortak, konkretisht shoqëria postare “T.N.T Express Albania” sh.p.k. Sipas dokumentacionit gjyqësor, mosparaqitja e tij në seancë dhe pamundësia për ta njoftuar me postë apo forma të tjera ligjore kanë çuar gjykatën në përfundimin se vendndodhja e tij nuk dihet.
Në këto kushte, Gjykata e Shkallës së Parë e Juridiksionit të Përgjithshëm, Rrethi Tiranë, ka vendosur që njoftimi për Dionis Teqjan të kryhet përmes shpalljes publike, në zbatim të nenit 133 të Kodit të Procedurës Civile. Shpallja është afishuar në Njësinë Administrative nr. 5 në Tiranë dhe në ambientet përkatëse të gjykatës, duke e konsideruar njoftimin të kryer ligjërisht sipas Weblajm.al.
Sipas të dhënave zyrtare, çështja civile mban numrin 1234 dhe daton më 10 dhjetor 2025. Paditës është Thanas Hyseni, ndërsa të paditur rezultojnë Ferdinand Haxhiaj, Dionis Teqja, shoqëria “RADMAIL” sh.p.k. dhe “T.N.T Express Albania” sh.p.k. Palë e tretë në proces është përfshirë edhe Qendra Kombëtare e Biznesit. Objekti i padisë lidhet me pavlefshmërinë e një vendimi të asamblesë dhe kërkesën për sigurim padie.
Aksioneri paditës, i cili zotëron një pjesë minoritare të kompanisë postare, pretendon se janë kryer veprime në kundërshtim me statutin e shoqërisë dhe ka kërkuar ndërhyrjen e gjykatës për pezullimin e efekteve të vendimeve të marra, deri në shqyrtimin përfundimtar të çështjes.
Seanca e radhës gjyqësore është caktuar për datën 13 shkurt 2026, në orën 13.00, ku pritet që Dionis Teqja të paraqitet ose të përfaqësohet ligjërisht. Në të kundërt, procesi do të vijojë edhe në mungesë të tij, pasi njoftimi konsiderohet i vlefshëm sipas ligjit.
Neni 133 i Kodit të Procedurës Civile parashikon qartë se, kur vendbanimi ose vendqëndrimi i një personi nuk dihet dhe njoftimi nuk mund të kryhet me mënyrat e zakonshme, gjykata ka të drejtë të përdorë shpalljen publike. Pas afishimit për një periudhë jo më pak se 20 ditë, pala konsiderohet e njoftuar ligjërisht, pavarësisht nëse paraqitet apo jo.
Rasti i Dionis Teqjas, një prej emrave më të njohur të biznesit në vend, ngre pikëpyetje mbi mungesën e tij në një proces civil të rëndësishëm dhe faktin që drejtësia është detyruar ta “kërkojë” përmes shpalljeve publike, një procedurë që zakonisht aplikohet për persona të paarritshëm ose me vendndodhje të panjohur.
