Presidenti i Republikës Bajram Begaj ka përcjellë mesazhin e tij për Vitin e Ri 2026, duke vënë theksin te roli i familjes, puna e ndershme dhe nevoja për bashkëpunim rreth interesave kombëtare.
Në fjalën drejtuar qytetarëve, Kreu i Shtetit e cilësoi natën e ndërrimit të viteve si një moment reflektimi për atë që është lënë pas dhe për shpresat e së ardhmes, duke theksuar se kjo festë është mbi të gjitha festa e familjes. Sipas tij, vlerat që kultivohen brenda familjes janë baza e forcës dhe qëndrueshmërisë së shoqërisë shqiptare.
Presidenti Begaj nënvizoi se kujdesi për fëmijët dhe të rinjtë nuk është vetëm një ndjenjë, por një zgjedhje e mençur për të ardhmen e vendit, duke e konsideruar investimin te brezi i ri si gur themeli të Shqipërisë evropiane që synohet të ndërtohet.
Duke vlerësuar kontributin e qytetarëve, ai theksoi se dija, përkushtimi dhe puna e ndershme janë forca kryesore e shqiptarëve, ndërsa çdo arritje është rezultat i angazhimit të përditshëm dhe sakrificave familjare, jo i deklaratave të mëdha.
Në analizën e vitit që po mbyllet, Presidenti e cilësoi atë si një vit sfidash dhe përpjekjesh, ku Shqipëria ka treguar vullnet për të ecur përpara. Ai theksoi se mbetet ende punë për të ngushtuar pabarazitë dhe për të forcuar besimin te institucionet, ndërsa vuri në dukje progresin në forcimin e shtetit të së drejtës, luftën kundër korrupsionit dhe krimit të organizuar, si dhe në pavarësinë e sistemit të drejtësisë.
Sipas Presidentit, viti 2026 duhet të jetë viti i një përpjekjeje të përbashkët për ta kthyer standardin evropian në një realitet të prekshëm në jetën e çdo familjeje shqiptare. Ai theksoi se interesi kombëtar dhe dialogu duhet të udhëheqin veprimet publike, pasi ajo që bashkon shoqërinë është më e fortë se çdo interes që e ndan.
Në mesazhin e tij, Begaj përcolli përshëndetje për shqiptarët në Kosovë, Maqedoninë e Veriut, Mal të Zi, Luginën e Preshevës, arbëreshët dhe Diasporën, duke i cilësuar si pjesë të pandarë të kombit dhe një energji jetike për të ardhmen e përbashkët.
Një urim i veçantë iu drejtua mjekëve, infermierëve, pjesëtarëve të Forcave të Armatosura, punonjësve të rendit, zjarrfikësve, gazetarëve dhe të gjithë atyre që në natën e Vitit të Ri janë në detyrë, larg familjeve të tyre, si edhe personave që e kalojnë këtë natë në spitale apo në kushte të vështira.
Në përmbyllje, Presidenti uroi shëndet, gëzime dhe mbarësi për çdo familje shqiptare dhe bëri thirrje për më shumë besim dhe mirëkuptim mes qytetarëve, duke theksuar se Shqipëria është shtëpia e përbashkët dhe përgjegjësi e përditshme e të gjithëve. /skyweb.al
