Sistemi europian i alarmit të shpejtë për ushqimin, RASFF, ka publikuar një njoftim sigurie lidhur me prani të niveleve të larta të akrilamides në një produkt kafeje me origjinë nga Kosova, i eksportuar nga Devolli Corporation.
Lajmi është bërë publik fillimisht nga autoritetet kroate dhe më pas është konfirmuar zyrtarisht edhe nga Agjencia e Ushqimit dhe Veterinarisë së Kosovës (AUVK).
Çfarë është substanca kancerogjene Acrylamide që u gjet në Prince Caffe të Devolli Corporation
Sipas komunikatës zyrtare të AUVK-së, alarmi mban numrin 2025.10458 dhe lidhet me produktin “Caffe Monaco” 400 gram, kafe e bluar, e cila ka rezultuar me përmbajtje të lartë të akrilamides.
Autoritetet kosovare bëjnë me dije se janë duke u ndërmarrë veprimet përkatëse sipas legjislacionit në fuqi, në bashkëpunim me institucionet vendore dhe ndërkombëtare.
Megjithatë, deri më tani nuk ka informacion të detajuar nëse produkti është tërhequr nga tregu, nëse alarmi lidhet me një lot të caktuar prodhimi apo nëse janë kryer kontrolle shtesë në pikat e shitjes. Mungesa e këtyre sqarimeve ka ngritur pikëpyetje mbi transparencën institucionale dhe nivelin e informimit të konsumatorëve.
Në këtë situatë, vëmendja zhvendoset edhe drejt Shqipërisë, ku pritet një reagim zyrtar nga Autoriteti Kombëtar i Ushqimit, për të sqaruar nëse produkti është i pranishëm në tregun shqiptar dhe çfarë masash do të merren për garantimin e sigurisë ushqimore.
Çfarë janë akrilamidet dhe pse përbëjnë rrezik
Akrilamidet janë substanca kimike që formohen gjatë përpunimit termik në temperatura të larta, kryesisht në ushqime me përmbajtje të lartë niseshteje. Ato janë të pranishme në produkte si kafeja, patatet e skuqura, biskotat, pica dhe ushqime të tjera të pjekura ose të skuqura.
Që prej vitit 1994, Agjencia Ndërkombëtare për Kërkime mbi Kancerin (IARC) i ka klasifikuar akrilamidet si substanca potencialisht kancerogjene për njerëzit. Studime të shumta shkencore kanë sugjeruar se ekspozimi afatgjatë mund të lidhet me rritjen e rrezikut për disa lloje kanceri, si edhe me dëmtime të sistemit nervor.
Një meta-analizë e publikuar në vitin 2022 në revistën shkencore Frontiers in Nutrition, e cila analizoi të dhënat e mbi 1 milion personave, gjeti lidhje mes konsumit të vazhdueshëm të akrilamides dhe rritjes së rrezikut për kancer të zgavrës orale, stomakut, ezofagut, prostatës, pankreasit dhe tiroides.
Organizata europiane për mbrojtjen e konsumatorëve Safe Food Advocacy Europe ka theksuar vazhdimisht nevojën për masa më të forta rregullatore dhe informim më të qartë të publikut për rreziqet që lidhen me këtë përbërës.
Ndërkohë, konsumatorët në rajon mbeten në pritje të veprimeve konkrete dhe sqarimeve të plota nga autoritetet përgjegjëse, për të garantuar që produktet ushqimore që qarkullojnë në treg janë në përputhje me standardet e sigurisë së Bashkimit Evropian.
Ndërkohë, kompania Devolli Group ka reaguar duke hedhur poshtë njoftimin e autoriteteve të BE-së duke e cilësuar këtë një lajm të sponsorizuar nga konkurrentët. /skyweb.al
