Fillimi i një viti të ri shpesh duket si momenti ideal për një fillim të freskët, për të lënë pas shqetësimet dhe presionet e 12 muajve të fundit dhe për ta parë botën ndryshe. Megjithatë, është shumë më e lehtë të premtojmë se do të ndryshojmë mënyrën si mendojmë, sesa ta bëjmë realisht këtë ndryshim.
Fatmirësisht, kërkimet shkencore ofrojnë mënyra konkrete për të përmirësuar gjendjen shpirtërore. Nga përdorimi i zemërimit në mënyrë konstruktive deri te shfrytëzimi i telefonit në favorin tuaj, ja nëntë këshilla të zbuluara gjatë raportimeve tona.
Hiqni dorë nga perfeksioni
Perfeksionii shpesh shihet si një tipar pozitiv. Por, siç thuhet shpesh, “perfektja është armiku i së mirës”. Për më tepër, perfeksioni mund të dëmtojë shëndetin.
Studimet tregojnë se një mendësi perfeksioniste lidhet me depresionin dhe ankthin, si dhe me probleme të tjera si ankthi social, çrregullimi obsesiv-kompulsiv, çrregullimet e të ushqyerit, lodhja kronike, pagjumësia dhe madje rreziku i vetëdëmtimit. Perfeksionistët vendosin standarde joreale dhe, kur nuk i arrijnë, përjetojnë ndjenja të forta faji, turpi dhe zemërimi. Ata e kritikojnë vazhdimisht veten dhe rrallë ndihen “mjaftueshëm mirë”.
Ekspertët sugjerojnë se një nga mbrojtjet më të forta kundër ankthit dhe depresionit është vetë-dhembshuria. Tregohuni të sjellshëm me veten. Gabimet janë pjesë e të qenit njerëzor. Nëse keni fëmijë, përpiquni të krijoni një mjedis ku papërsosmëria jo vetëm pranohet, por edhe vlerësohet.
Ndërtoni miqësi më të shëndetshme
Miqësitë janë thelbësore për shëndetin tonë. Ato ndikojnë gjithçka, nga forca e sistemit imunitar deri te rreziku për sëmundje të zemrës. Marrëdhëniet e mira shoqërore madje lidhen me jetëgjatësi më të madhe.
Por vlen të reflektojmë edhe mbi rolin tonë si miq. Marrëdhëniet e paqëndrueshme, ku sjellja ndryshon shpesh, mund të jenë më të dëmshme sesa marrëdhëniet vazhdimisht negative.
Një hap i thjeshtë është të flisni më shumë për lajme të mira. Pyesni, tregoni interes dhe shprehni gëzim për sukseset e të tjerëve. Kjo përmirëson jo vetëm humorin tuaj, por edhe lidhjet shoqërore.
Merrni pjesë në aktivitete shoqërore
Nuk është kurrë vonë për të nisur një hobi të ri.
Aktivitete si vizatimi, muzika apo sportet në grup ndihmojnë në përmirësimin e humorit dhe krijimin e lidhjeve të reja. Kur fokusohemi te aktiviteti dhe jo te aftësitë tona, mendja qetësohet. Sportet ekipore, në veçanti, e bëjnë ushtrimin më të lehtë dhe më argëtues falë ndjenjës së qëllimit të përbashkët.
Provoni diçka të re këtë vit, mund të takoni njerëz që përndryshe nuk do t’i kishit njohur kurrë.
Përdoreni zemërimin në mënyrë konstruktive
Zemërimi mund të jetë shkatërrues kur del jashtë kontrollit. Por, nëse njihet dhe menaxhohet në kohë, ai mund të shndërrohet në energji pozitive.
Shtypja e zemërimit mund të jetë e dëmshme për shëndetin. Në vend të kësaj, kanalizojeni atë në aktivitete që ju shërbejnë: sport, përpjekje fizike, këmbëngulje apo edhe krijimtari. Çelësi është kontrolli i mënyrës së shprehjes së zemërimit – duke marrë distancë psikologjike, duke treguar durim dhe duke shtyrë reagimet impulsive.
Në këtë mënyrë, zemërimi mund të shndërrohet nga një forcë shkatërruese në një mjet për rritje personale dhe mirëqenie. /skyweb.al
