Kryeministri Edi Rama ka drejtuar mbledhjen e Komitetit Ndërministror të Emergjencave Civile, ku u diskutua situata e krijuar nga përmbytjet e ditëve të fundit si pasojë e reshjeve intensive të shiut.
Gjatë fjalës së tij, Rama deklaroi se për vitin aktual janë parashikuar investime prej 11 milionë eurosh për emergjencat, rreth 8 për qind më shumë krahasuar me një vit më parë.
Sipas tij, këto investime kanë mundësuar rehabilitimin e 536 kanaleve ujitëse dhe kulluese, të cilat më herët funksiononin vetëm pjesërisht.
Kryeministri theksoi se një nga ndërhyrjet kryesore ka qenë transformimi i strukturave të emergjencave, duke i kthyer ato nga trupa jo funksionale në struktura operative që reagojnë në kohë reale në terren.
Ai nënvizoi se reshjet e pazakonta kanë prekur njësoj vendet e rajonit, por sipas tij, Shqipëria ndodhet sot në një situatë më të përgatitur për t’i përballuar këto fenomene.
Rama u shpreh se qeveria ka përballuar detyrimet e saj edhe në të shkuarën, pavarësisht vështirësive financiare, dhe garantoi se e njëjta qasje do të ndiqet edhe tani për familjet e dëmtuara, si për banesat ashtu edhe për gjënë e gjallë.
Ai theksoi se angazhimi i strukturave shtetërore dhe i bashkive do të vijojë pa ndërprerje, 24 orë në të gjithë territorin ku paraqitet nevoja, deri në kalimin e plotë të situatës së vështirë.
Rama u bëri thirrje edhe deputetëve që të jenë të pranishëm pranë qytetarëve jo vetëm gjatë emergjencës, por edhe pas përfundimit të saj, duke e cilësuar këtë si pjesë të përgjegjësisë institucionale ndaj njerëzve të prekur./skyweb.al
