Një aktivitet i mirëorganizuar i falsifikimit dhe tregtimit të veshjeve me logo të markave të njohura ndërkombëtare është goditur nga autoritetet shqiptare, pas zbulimit të një magazine ilegale në Kamëz, ku stampoheshin veshje dhe këpucë kontrabandë me marka false si Tommy Hilfiger dhe Lacoste.
Operacioni policor, i koduar “Brands 2”, u finalizua nga Sektori për Hetimin e Krimit Ekonomik dhe Financiar në Policinë e Shtetit, në bashkëpunim me Prokurorinë e Tiranës. Si rezultat, u arrestua shtetasi turk Ozkan Sulun, 46 vjeç, ndërsa në kërkim është shpallur Mehmet Karçiga, 50 vjeç, po ashtu shtetas turk. Paralelisht, ka nisur procedimi penal në gjendje të lirë për tre punonjëse të magazinës.
Sipas hetimeve, magazina shërbente si pikë grumbullimi dhe falsifikimi, ku veshjeve dhe këpucëve të futura kontrabandë u vendoseshin logo false të markave të njohura, për t’u hedhur më pas në treg si produkte origjinale.
Gjatë kontrollit, policia sekuestroi sasi të mëdha mallrash, përfshirë veshje dhe këpucë të falsifikuara, makineri lazeri dhe pajisje printimi për stampimin e logove, stampa të markave ndërkombëtare, një aparat celular si dhe dokumente të ndryshme që pritet të shërbejnë për thellimin e hetimeve.
Autoritetet konfirmojnë se mallrat e gjetura dyshohet se kishin shmangur detyrimet doganore dhe se aktiviteti i paligjshëm përfshinte disa vepra të rënda penale, mes tyre shkelja e të drejtave të pronësisë industriale, kontrabanda, tregtimi i mallrave kontrabandë, punësimi i paligjshëm, fshehja e të ardhurave dhe falsifikimi i stampave.
Policia vijon punën për lokalizimin dhe arrestimin e shtetasit turk të shpallur në kërkim, ndërsa materialet procedurale i janë referuar Prokurorisë së Tiranës për veprime të mëtejshme ligjore.
