Kryeministri Edi Rama, së bashku me zv/kryeministren dhe ministren e Infrastrukturës dhe Energjisë Belinda Balluku, prezantuan investimin për parkun eolik të Tropojës, një projekt me kapacitet të pritshëm prej 600 MW.
Parku po zhvillohet nga kompania amerikane CWP dhe përfaqëson hyrjen e Shqipërisë në fazën e realizimit të projekteve konkrete të energjisë së erës, si pjesë e strategjisë për diversifikimin e burimeve energjetike.
Gjatë prezantimit, Balluku theksoi se që prej vitit 2018 Shqipëria ka ndjekur një strategji për krijimin e burimeve alternative të energjisë, fillimisht me energjinë diellore dhe më pas me atë eolike. Sipas saj, investimet e huaja direkte janë tregues i stabilitetit ekonomik dhe institucional, ndërsa vetëm së fundmi mbi 1.5 miliardë euro investime private janë në proces në sektorin energjetik.
Zv/kryeministrja bëri të ditur se në total janë angazhuar mbi 2 miliardë euro investime dhe se portofoli i projekteve do të çojë kapacitetet energjetike përtej 1500 MW. Ajo nënvizoi se parqet eolike kërkojnë studime dhe ndërtim më kompleks, por diversifikimi i burimeve e bën vendin më të qëndrueshëm ndaj ndryshimeve klimatike.
Sipas Ballukut, këto investime reduktojnë varësinë nga importet e energjisë, krijojnë vende pune, rrisin të ardhurat dhe forcojnë ekonominë lokale. Ajo shtoi se Shqipëria po investon paralelisht në linjat e transmetimit dhe lidhjet ndërkufitare, duke përmendur përfundimin pothuajse të plotë të linjës drejt Maqedonisë së Veriut dhe pozicionin e vendit si një nga më të lidhurit në sistemin rajonal të transmetimit energjetik.
