Kryeministri Edi Rama ka mbrojtur vendimin e qeverisë për financimin me 4.2 milionë euro të koncertit të Kanye West në Tiranë, duke thënë se nuk duhet parë vetëm kostoja, por vlera që krijon një event i tillë.
Sipas tij, një koncert i përmasave ndërkombëtare nuk lë pas vetëm kujtime për pjesëmarrësit, por sjell të ardhura për hotelet, restorantet, kafenetë, dyqanet, transportin, sigurinë dhe logjistikën.
Rama tha se organizimi i një eventi të tillë i tregon botës se Shqipëria është një vend ku mund të zhvillohen ngjarje të mëdha me siguri dhe profesionalizëm.
Ai e lidhi vendimin e qeverisë edhe me klimën e krijuar nga protestat dhe reagimet në rrjetet sociale, duke thënë se anulimi i koncertit do të dëmtonte imazhin e vendit te turistët dhe investitorët.
“Parafytyroni si ka shkuar ky mesazh te të huajt që kanë rezervuar të vijnë javët dhe muajt në vijim dhe, ndërkohë, ishin duke menduar anulimin e rezervimeve për shkak të protestës. Merreni me mend çfarë impakti negativ do të kishte anulimi i koncertit më të madh që Shqipëria ka organizuar ndonjëherë, jo vetëm për turistët, por edhe për investitorët e huaj. Investimet e huaja shkojnë aty ku ka besim, energji, siguri, reputacion dhe një shoqëri që beson te e ardhmja e vet”, u shpreh ai.
Kryeministri tha se Shqipëria nuk duhet të pyesë vetëm sa kushton një investim i tillë, por sa vlerë krijon ai për ekonominë dhe promovimin e vendit.
“Shqipëria e sotme s’duhet të pyesë vetëm: ‘Sa kushton?’. Shqipëria e sotme, që synon Ligën e Kampionëve të Mesdheut turistik, duhet të pyesë: ‘Sa vlerë krijohet nga ky investim?’. Kush është i varfër në aspiratë është i dënuar të mbetet shumë më mbrapa se mundësitë që ai ka”, tha Rama.
Duke iu përgjigjur kritikave për shumën prej 4 milionë eurosh, Rama tha se paratë u dhanë në minutën e fundit për të shmangur një dëm më të madh ekonomik dhe reputacional.
“Dy fjalë për 4 milionë eurot: po, ato 4 milionë euro ishin investim, i bërë në minutën e fundit për të shpëtuar investime shumë më të mëdha për Shqipërinë, ekonominë e Tiranës dhe mijëra njerëz nga mbi 80 vende të botës që kishin prerë biletat për të ardhur këtu. Ishte një investim për të mos hapur një plagë të re mosbesimi ndaj një Shqipërie ku i kanë sytë të gjithë“, u shpreh Rama.
Në fund, kryeministri tha se këto para nuk do të kishin dalë nga buxheti i shtetit nëse nuk do të ishte krijuar një klimë kërcënimesh dhe pasigurie.
“E vërteta e 4 milionëshit është edhe më e plotë se kaq. Ato para nuk do të kishin dalë nga arka e shtetit po të mos ishin bërë kërcënimet, shantazhet dhe histeria e dhunshme e rrjeteve sociale”, deklaroi Rama.
Deklarata e tij e zhvendos debatin nga kostoja e koncertit te përgjegjësia për klimën që, sipas qeverisë, detyroi ndërhyrjen financiare të shtetit. /skyweb.al
