Gjithnjë e më shumë të rinj në të 20-at po heqin dorë nga cigaret elektronike dhe po përqafojnë sërish pirjen e duhanit tradicional, një prirje e pazakontë që po tërheq vëmendjen e studiuesve dhe ekspertëve të shëndetit, raporton The Wall Street Journal.
Në artikullin, gazeta përshkruan se si pirja e cigareve po rikthehet në rrethet e të rinjve studente, jo si një zakon i fshehtë, por si një veprim i hapur dhe shpesh social.
Autorja e artikullit rrëfen një episod domethënës nga një festë fundviti me studentë dhe ish-studentë të saj të studimeve pasuniversitare. Ndryshe nga vitet e mëparshme, kur vetëm pak persona dilnin jashtë për të pirë duhan, këtë herë një numër i madh të rinjsh po dilnin vazhdimisht në hyrje të ndërtesës për të ndezur cigare.
“Ka gjithmonë disa duhanpirës, të mbështjellë me pallto, që përballen me të ftohtin,” shkruan autorja, “por këtë vit ishte një turmë e tërë.”
Sipas Wall Street Journal, disa të rinj e shohin cigaren tradicionale si më “të thjeshtë” dhe më pak shqetësuese sesa vape i cili lidhet gjithnjë e më shumë me debate shëndetësore, pajisje elektronike, kimikate dhe varësi të vazhdueshme. Për disa prej tyre, në një periudhë të mbushur me pasiguri ekonomike, ankth social dhe stres global, pirja e një cigareje perceptohet paradoksalisht si “gjëja më pak e rrezikshme” në jetën e tyre të përditshme.
Artikulli thekson gjithashtu aspektin social dhe ritual të duhanit: ndalesat e shkurtra, bisedat spontane dhe ndjesia e përbashkët e rebelimit të butë, elemente që vape, sipas disa të rinjve, nuk i ofron më.
Megjithatë, ekspertët e shëndetit publik paralajmërojnë se ky rikthim te cigaret tradicionale mbetet shqetësues, pasi duhani i djegur vazhdon të jetë një nga shkaqet kryesore të sëmundjeve serioze dhe vdekjeve të parandalueshme në mbarë botën.
The Wall Street Journal e përshkruan këtë fenomen si një pasqyrim të marrëdhënies së ndërlikuar që brezat e rinj kanë sot me rrezikun, shëndetin dhe identitetin social, një zgjedhje që duket se lidhet më shumë me gjendjen shpirtërore të kohës sesa me mungesë informacioni. /skyweb.al
