Skandali i lidhur me projektin Durana Tech Park ka hyrë në një fazë të re, pasi Prokuroria e Posaçme Antikorrupsion ka nisur verifikimet për kompanitë e regjistruara në këtë park teknologjik.
Burime bëjnë me dije se hetimet po shtrihen në funksion të të dhënave të mbledhura në dosjen e AKSHI-t, ku janë dokumentuar skema të përqendrimit të tenderëve publikë dhe dyshime për shmangie taksash.
EKSKLUZIVE / Skandali AKSHI, SPAK shtrin hetimet edhe te DURANA Tech Park
Sipas informacionit të siguruar, Durana po trajtohet nga SPAK si një element i lidhur me të njëjtin rreth aktorësh ekonomikë që janë nën hetim për çështjen e AKSHI-t, duke ngritur dyshime për një skemë më të gjerë financiare.
Çfarë është Durana Tech Park
Durana është një park teknologjik dhe shkencor, i krijuar në bazë të ligjit për parqet teknologjike dhe i administruar nga Korporata Shqiptare e Investimeve. Parku është shpallur zonë e lirë për zhvillimin e teknologjisë së informacionit dhe u garanton subjekteve të regjistruara një regjim fiskal të favorshëm, që përfshin lehtësira dhe përjashtime nga tatim-fitimi, tatimi mbi të ardhurat personale dhe TVSH-ja, sipas parashikimeve ligjore.
Ky mekanizëm u aplikua në një periudhë kur privilegjet fiskale për kompanitë e IT-së po hiqeshin, pas presionit të fortë ndërkombëtar dhe rekomandimeve të institucioneve si OECD dhe Bashkimi Europian. Për këtë arsye, Durana është konsideruar nga kritikët si një skemë alternative për ruajtjen e përfitimeve fiskale për një grup të kufizuar kompanish.
Kompanitë dhe përfituesit e dyshuar
Sipas të dhënave të disponueshme, në Durana Tech Park janë regjistruar dhjetëra kompani, një pjesë e të cilave dyshohet se lidhen me persona të përfshirë në dosjen e AKSHI-t. Mes emrave të përmendur në verifikime rezultojnë biznesmenë si Ermal Beqiri dhe Ergys Agasi, si dhe kompani të lidhura me ta.
Po ashtu, në listën e subjekteve të regjistruara përmenden kompani të lidhura me Bledar Dhimën, Renis Tërshanën, Gëzim Hoxhën, Jona Bojdarën, Sara Agon, Rigels Hoxhën, Kreshnik Rexhën, Arjola Koromanin, Ervin Mançen, Gjergji Robon, Henklajd Sunashin, Xheni Kobuzin dhe të tjerë.
SPAK po verifikon nëse regjistrimi i këtyre subjekteve në Durana është përdorur për favorizim dhe shmangie taksash dhe nëse ekziston një lidhje funksionale mes këtij projekti dhe skemës së hetuar në dosjen AKSHI.
Denoncimet e Arben Ahmetajt
Ish-zëvendëskryeministri Arben Ahmetaj ka denoncuar publikisht projektin Durana, duke deklaruar se ai u përdor si një rrugë e re për favorizimin fiskal të kompanive të IT-së, pas rrëzimit të skemës së mëparshme të taksimit preferencial. Sipas Ahmetajt, përmes regjistrimit në Durana, kompani që fitonin tenderë publikë përfitonin njëkohësisht edhe përjashtime nga detyrimet tatimore.
Këto deklarime kanë ngritur pikëpyetje mbi qëllimin real të parkut dhe mbi përputhjen e aktivitetit të subjekteve të regjistruara me kriteret ligjore për kërkim-zhvillim dhe inovacion.
Lidhja me dosjen AKSHI
Verifikimet e SPAK për Durana lidhen me hetimet për AKSHI-n, ku është dokumentuar një skemë e shpërndarjes së tenderëve publikë te një numër i kufizuar kompanish, përmes kostove të fryra dhe ndikimit në proceset e prokurimit. Hetimet kanë treguar se këto kompani përfitonin fonde publike dhe, sipas dyshimeve, shmangnin detyrimet fiskale.
Në këtë kuadër, Durana po shihet si një hallkë shtesë e së njëjtës skemë, ku përfitimi shtrihej si në fondet publike ashtu edhe në regjimin fiskal të favorshëm, duke i shkaktuar dëm të dyfishtë buxhetit të shtetit.
LISTA ME KOMPANITË E REGJISTRUARA NË DURANA TECH PARK
/skyweb.al
