Shqipëria ka shënuar rritjen më të lartë të net-qëndrimeve në Europë në tremujorin e tretë të vitit 2025, sipas të dhënave që janë bërë publike nga Eurostat.
Nga veriu në jug të Shqipërisë, net-qëndrimet në njësi akomoduese në periudhën korrik-shtator u rritën me 30%, në krahasim me të njëjtën periudhë të një viti më parë, me ritme shumë më të larta se në Europë, që e kishte këtë tregues vetëm 1.7%.
Shteti i dytë me rritjen më të lartë vjetore të vizitorëve në tremujorin e tretë është Islanda, me 13%.
Në tremujorin e tretë, sipas Eurostat, në Shqipëri u shënuan gjithsej 5.3 milionë net-qëndrime. Numri më i lartë ishte në gusht, me 2.3 milionë, i ndjekur nga korriku me 1.8 milionë. Vizitorët e huaj zunë 75% të net-qëndrimeve. Ata kishin dhe rritjen më të fortë në krahasim me të njëjtin tremujor të një viti më parë, me 38.8%, kundrejt 9.5% të vendasve.
Në rajon, në Mal të Zi, rritja ishte minimale, vetëm 0.1%, në Maqedoninë e Veriut 1.8%, në Serbi ra me 0.5%. Kosova ishte shteti që pa një tendencë më pozitive, me +11.7%. Mungojnë të dhënat për Turqinë, që është një destinacion i madh turistik.
Europa
Sipas Eurostat, në tremujorin e tretë të vitit 2025, në strukturat akomoduese turistike të Bashkimit Europian u regjistruan 1.27 miliardë net- qëndrimi. Kjo përfaqëson 21.3 milionë net më shumë krahasuar me tremujorin e tretë të vitit 2024. Rritja prej 1.7% në tremujorin e tretë tregon një ecuri disi më të ngadaltë krahasuar me gjysmën e parë të vitit (+2.3%).
21 vende të BE-së raportuan një trend pozitiv, ndërsa 6 vende shënuan rënie krahasuar me tremujorin e tretë të vitit 2024.
Rritjet më të larta u regjistruan në Luksemburg (+6.4%), Maltë (+5.9%) dhe Poloni (+5.9%). Në terma absolutë, kontributin më të madh në rritjen prej 21.3 milionë netësh e patën Franca (+6.0 milionë), Italia (+5.2 milionë) dhe Spanja (+3.2 milionë).
Gjatë tremujorit veror, numri më i lartë i netëve të qëndrimit në BE u regjistrua në gusht (501.2 milionë), i ndjekur nga korriku (460.3 milionë). Gushti ishte gjithashtu muaji kryesor në 20 nga 27 vendet e BE-së, ndërsa korriku regjistroi numrin më të lartë të qëndrimeve turistike në 7 vendet e tjera, përkatësisht në Belgjikë, vendet nordike Danimarkë, Suedi dhe Finlandë, si dhe vendet baltike Lituani, Letoni dhe Estoni.
Po ashtu, edhe në vendet e EFTA-s, Islandë dhe Norvegji, korriku rezultoi muaji me numrin më të lartë të netëve turistike. /Monitor
