Agjencia Evropiane e Barnave (EMA) bëri të ditur se sëmundjet kardiovaskulare vazhdojnë të jenë shkaktari kryesor i vdekjeve në Evropë, duke marrë çdo vit jetën e rreth 1.7 milion njerëzve.
Drejtoresha e Departamentit të Fushave Terapeutike në EMA, Francesca Day, theksoi se këto sëmundje mbeten problemi më i madh shëndetësor në kontinent. Ajo shtoi se pasojat e tyre nuk kufizohen vetëm te vdekshmëria, por përfshijnë edhe paaftësinë, daljen e parakohshme në pension dhe mungesat në punë, çka ndikon drejtpërdrejt në cilësinë e jetës dhe ul jetëgjatësinë mesatare.
Sipas saj, të dhënat tregojnë një rritje shqetësuese të faktorëve të rrezikut: 54 për qind e të rriturve janë mbipeshë, një në tre të rinj është mbipeshë ose obez, ndërsa 25 për qind e popullsisë vuan nga hipertensioni.
Day rikujtoi se Komisioni Evropian ka nisur së fundmi Planin e BE-së për Zemra të Sigurta (EU Safe Hearts Plan), duke theksuar se EMA do ta mbështesë këtë iniciativë brenda kompetencave të saj.
Ajo foli gjithashtu për agonistët e receptorit GLP-1, një klasë barnash të zhvilluara fillimisht për trajtimin e diabetit dhe që përdoren edhe kundër obezitetit, duke vënë në dukje interesin e lartë publik për to. Megjithatë, Day paralajmëroi se këto barna nuk përbëjnë një zgjidhje të shpejtë për ndryshimin e stilit të jetesës, pasi janë trajtime afatgjata dhe duhet të përdoren vetëm nën mbikëqyrje mjekësore. /skyweb.al
