Hapet sot qarkullimi në rrugën Qukës – Qafë Plloçë
Pas bllokimit total në fillim të muajit, si pasojë e rrëshqitjeve masive të dherave, rruga Qukës – Qafë Plloçë është hapur pjesërisht për qarkullim.
Gjatë ditës së djeshme ka nisur lëvizja e mjeteve vetëm për banorët dhe automjetet që kanë destinacion fshatrat e Pogradecit të lidhura me këtë aks rrugor.
Sipas burimeve zyrtare, është bërë largimi i plotë i masivit të madh shkëmbor që ra rreth 10 ditë më parë, si pasojë e reshjeve intensive dhe motit të keq që përfshiu qarkun e Korçës.
Aktualisht, kompania kontraktore vijon punën për pastrimin e trupit të rrugës nga balta dhe inertet, ndërsa gjatë ditës së sotme pritet të normalizohet edhe qarkullimi i mjeteve me destinacion Elbasanin dhe Korçën në të dy drejtimet.
Autoritetet u bëjnë thirrje drejtuesve të mjeteve të tregojnë kujdes të shtuar gjatë lëvizjes, për shkak të kushteve ende të paqëndrueshme në zonë. /skyweb.al
