Fermerët do të përfitojnë kompensim të TVSH-së në masën 10 për qind për produktet dhe shërbimet bujqësore të furnizuara, në kuadër të skemës së autofaturimit të zbatuar nga administrata tatimore.
Sipas sqarimeve zyrtare, kompensimi realizohet përmes një procedure të përcaktuar qartë, ku rolin kryesor e mban blerësi i regjistruar për TVSH-në.
Në këtë skemë, blerësi i regjistruar për TVSH, në cilësinë e grumbulluesit, përpunuesit ose agroturizmit të certifikuar, lëshon faturë tatimore në emër të prodhuesit bujqësor. Kjo faturë, e njohur si autofaturë, dokumenton mallrat ose shërbimet e blera nga fermeri dhe shërben si bazë për llogaritjen e kompensimit.
Në faturë duhet të pasqyrohet detyrimisht NIPT i fermerit, si dhe të gjithë elementët e tjerë të parashikuar nga legjislacioni tatimor.
Administrata tatimore sqaron se për të përfituar kompensimin, fermerët duhet të plotësojnë disa kushte themelore. Qarkullimi i tyre vjetor nuk duhet të tejkalojë kufirin minimal të regjistrimit për TVSH.
Produktet ose shërbimet duhet të jenë rezultat i drejtpërdrejtë i aktivitetit bujqësor dhe të shiten te persona të tatueshëm që nuk përfitojnë nga skema e kompensimit.
Po ashtu, fermerët duhet të jenë të pajisur me numër identifikimi NIPT nga administrata tatimore, pa pasur detyrim për deklarim periodik të TVSH-së.
Norma e kompensimit është 10 për qind e vlerës totale të produkteve dhe shërbimeve të furnizuara nga prodhuesi bujqësor, të dokumentuara me fatura tatimore, për një periudhë gjashtëmujore.
Për të përfituar pagesën, fermeri duhet të paraqesë kërkesën për kompensim pranë administratës tatimore, elektronikisht ose përmes shërbimit postar. Kërkesa duhet të shoqërohet me kopjet e faturave të lëshuara nga blerësi dhe me numrin e llogarisë bankare ku do të kryhet pagesa.
Kërkesa për kompensim paraqitet mbi bazë gjashtëmujore. Afati është deri më 31 dhjetor 2026 për furnizimet e kryera nga janari deri në qershor 2026 dhe deri më 30 qershor 2027 për furnizimet e realizuara nga korriku deri në dhjetor 2026. /skyweb.al
