Panorama e mjeteve që qarkullojnë në Shqipëri ka ndryshuar ndjeshëm gjatë viteve të fundit, sidomos pas hapjes së tregut aziatik të makinave.
Të dhënat më të fundit të publikuara nga INSTAT për tremujorin e parë të vitit 2025 tregojnë se, ndonëse Mercedes-Benzi mbetet një markë ikonë në rrugët shqiptare, ai nuk është më lideri absolut i preferencës së qytetarëve.
INSTAT bën me dije se për herë të parë, numri i automjeteve të reja të markës Volkswagen të regjistruara në Shqipëri gjatë tremujorit të parë 2025 ishte më i lartë se ai Mercedes Benz.
“Në mjetet e regjistruara për herë të parë, Volkswagen mban vendin e parë me 20,0 %, e ndjekur nga
Mercedes Benz me 19,0 %”.
Sipas INSTAT, deri në fund të marsit 2025, në territorin e Shqipërisë ishin në qarkullim gjithsej 976.916 mjete rrugore, me autoveturat që zënë 80,8% të totalit. Tirana mban bindshëm vendin e parë me 34,7% të mjeteve, ndërsa Durrësi vjen i dyti me 13,5%. Në fund të listës renditen Gjirokastra dhe Kukësi me përkatësisht 2,2% dhe 2,4%.
Në tremujorin e parë janë regjistruar për herë të parë 20.319 mjete, shumica dërrmuese prej 82% autovetura, me qarkun e Tiranës që përbën 40% të regjistrimeve të reja.
Megjithëse numri total i mjeteve në qarkullim ka shënuar një rritje prej 10,1% krahasuar me të njëjtën periudhë të vitit të kaluar, regjistrimet e reja kanë pësuar një rënie prej 4,4%. Ky tregues mund të sinjalizojë një ngopje të tregut.
Ajo që bie në sy është ndryshimi i shijes dhe tendencave të konsumatorëve shqiptarë. Markat aziatike, veçanërisht Toyota, Hyundai dhe Kia, po fitojnë terren të ndjeshëm në regjistrimet e reja, falë çmimit, efikasitetit të lartë të karburantit, kostos më të ulët të mirëmbajtjes dhe teknologjisë më të avancuar në modelet më të reja, shkruan skyweb.al.
Kjo përbën një sfidë serioze për dominimin historik të Mercedesit në Shqipëri, një markë që për vite me radhë ka qenë sinonim i prestigjit dhe fuqisë në rrugët shqiptare./skyweb.al
