Transporti ajror në Shqipëri ka shënuar një vit rekord gjatë vitit 2025, duke konfirmuar një ndryshim të qartë në mënyrën se si qytetarët udhëtojnë brenda dhe jashtë vendit për shkak edhe të shtimit të numrit të kompanive operuese dhe investimeve në TIA.
Në terma konkretë, mesatarisht çdo ditë nga Aeroporti Ndërkombëtar i Rinasit kanë udhëtuar mbi 31 mijë pasagjerë, një shifër që i korrespondon pothuajse popullsisë së një qyteti mesatar shqiptar.
Të dhënat më të fundit të publikuara nga INSTAT tregojnë se dinamika e transportit ajror ka vijuar edhe gjatë tremujorit të katërt të vitit, pavarësisht rënies sezonale që zakonisht shënohet pas muajve të verës.
Gjatë kësaj periudhe janë realizuar mijëra fluturime, duke garantuar një fluks të qëndrueshëm udhëtimesh, edhe pse me ritëm më të moderuar krahasuar me kulmin turistik të tremujorit të tretë.
Në total, përgjatë vitit 2025 janë kryer rreth 70 mijë fluturime, duke shënuar një rritje prej afro 2.2 për qind krahasuar me vitin pararendës. Kjo rritje e lëvizjeve ajrore është reflektuar drejtpërdrejt edhe në numrin e pasagjerëve, duke e kthyer avionin në një mjet gjithnjë e më të zakonshëm udhëtimi për shqiptarët.
Sipas përllogaritjeve, gjatë vitit të kaluar mbi 31 mijë pasagjerë në ditë kanë udhëtuar përmes transportit ajror. Në terma vjetorë, kjo do të thotë se çdo 24 orë, nga Rinasi është zhvendosur një popullsi e barabartë me atë të një qyteti të tërë, një tregues domethënës për shkallën që ka marrë tashmë trafiku ajror në vend.
Edhe tremujori i katërt ka konfirmuar këtë tendencë rritëse. Gjatë kësaj periudhe, përmes linjave ajrore kanë udhëtuar 2.611.748 pasagjerë, nga 2.385.329 që u regjistruan në të njëjtën periudhë të një viti më parë. Kjo përfaqëson një rritje prej 9.5 për qind, pavarësisht se bëhet fjalë për një sezon tradicionalisht më të qetë për udhëtimet ajrore.
Sipas të dhënave zyrtare të aeroportit, viti 2025 është mbyllur me një rekord historik për trafikun e pasagjerëve. Në total, gjatë gjithë vitit janë regjistruar rreth 11.6 milion udhëtarë, shifra më e lartë e shënuar ndonjëherë në Shqipëri.
Rritja e vazhdueshme e numrit të pasagjerëve, përfshirë edhe muajt jashtë sezonit veror, tregon se udhëtimet ajrore po kthehen në një element të qëndrueshëm të lëvizjes së qytetarëve. Ky zhvillim lidhet jo vetëm me turizmin, por edhe me emigracionin, udhëtimet familjare dhe lidhjet gjithnjë e më të shpeshta të Shqipërisë me tregjet dhe qytetet europiane, duke e pozicionuar transportin ajror si një nga shtyllat kryesore të mobilitetit modern në vend. /skyweb.al
