Ministrja e Brendshme, Albana Koçiu, bëri të ditur në një konferencë për shtyp se gjatë vitit janë sekuestruar 726 pasuri të dyshuara si të fituara nga krimi, me një total prej rreth 6 miliardë lekësh, të cilat tashmë do të administrohen në funksion të komuniteteve.
“Prej tyre, 64 pasuri janë konfiskuar dhe kanë kontribuar në mbështetjen e 15 projekteve me impakt social dhe shërbime direkte për komunitetin, si dhe janë vënë në dispozicion të 20 institucioneve publike për realizimin e programeve të tyre. Gjithashtu, është krijuar baza ligjore për transferimin e pronave të konfiskuara në pushtetin vendor për strehimin e personave në nevojë, si dhe për ngritjen e qendrave sociale apo rezidenciale për viktimat e dhunës, krimit dhe trafikimit”, tha ajo.
