Fenomeni i rrallë mjekësor i njohur si lithopedion përshkruan një rast kur një fetus vdes gjatë një shtatzënie abdominale dhe, me kalimin e kohës, kalcifikohet brenda trupit të nënës.
Më 25 qershor, faqja “Non Aesthetic Thing” në platformën X, me 4,8 milionë ndjekës, publikoi një imazh të një skaneri CT që tregonte një fetus të kalcifikuar, duke pretenduar se ai kishte qëndruar në trup për rreth 30 vjet. Postimi shoqërues theksonte se bëhej fjalë për një grua 73-vjeçare, tek e cila mjekët kishin zbuluar një fetus të kalcifikuar prej tre dekadash.
Raste të tilla janë jashtëzakonisht të rralla, por ofrojnë informacion të vlefshëm për komunitetin mjekësor. Në vitin 2013, ABC News raportoi për një grua 82-vjeçare nga Kolumbia, e cila kishte kërkuar ndihmë mjekësore për dhimbje në legen dhe u informua se shkaku ishte një fetus i kalcifikuar që kishte mbetur në trupin e saj për rreth 40 vjet.
Sipas Dr. Kim Garcsi nga University Hospitals Case Medical Center në Cleveland, kjo gjendje është aq e rrallë sa në literaturën mjekësore janë dokumentuar vetëm rreth 300 raste.
Lithopedioni zakonisht ndodh kur shtatzënia zhvillohet jashtë mitrës, zakonisht në bark (shtatzëni abdominale). Nëse fetusi nuk merr furnizim të mjaftueshëm me gjak dhe vdes, trupi nuk arrin ta eliminojë atë. Si mekanizëm mbrojtës, sistemi imunitar e mbështjell dhe e kalcifikon indin, në mënyrë të ngjashme me procesin që përdor për të izoluar trupa të huaj, duke parandaluar infeksionin dhe komplikacionet e tjera.
Edhe pse tingëllon e pazakontë, ky është një mekanizëm natyror mbrojtës që trupi e përdor shpesh për të ruajtur shëndetin.
