Të gjitha nënat e reja në Holandë kanë të drejtë ligjore për “kraamzorg”, një formë unike e kujdesit pas lindjes që ofrohet në ditët e para pasi sjellin në jetë fëmijën. Ja si e transformon ajo “tremujorin e katërt”, raporton BBC.
Nëna e re, Caterina Yannicelli, kujton se u ndje krejtësisht e papërgatitur për ardhjen e bebit, kur lindi katër javë para kohe me operacion cezarian, pas një komplikacioni të rrallë. “Nuk do të dinim as si ta rregullonim krevatin,” thotë ajo. “Nuk dinim si të bënim asgjë.”
E njëjta gjë ndodhi edhe me Elissa Fischel – ajo pati një lindje të papritur në shtëpi, kur foshnja erdhi disa javë më herët nga sa pritej. “Nuk dija si të ndërroja pelenën. Herën e parë që e bëra, e vura mbrapsht,” tregon Fischel.
Të gjithë prindërit e rinj në këtë vend të vogël europian përfitojnë mbështetjen e një profesionisti të trajnuar, i cili vjen në shtëpi menjëherë pas lindjes. Ata quhen “kraamverzorgenden” , kujdestarë të lehonisë.
Këta profesionistë zakonisht qëndrojnë deri në tetë ditë në shtëpinë e prindërve të rinj, duke ndihmuar me gjithçka, nga larja e rrobave deri te identifikimi i hershëm i problemeve shëndetësore.
Për Yannicelli-n, një amerikane që jetonte në Amsterdam dhe tani është kthyer në SHBA, prania e një profesionisti të trajnuar në shtëpi i dha më shumë siguri dhe vetëbesim. “Na dukej sikur nuk ishim vetëm,” thotë ajo.
Edhe Fischel u ndje njësoj. “Ishte shumë qetësuese të kishe dikë për t’i bërë pyetje,” shprehet ajo.
Të gjithë prindërit në Holandë kanë të drejtë për këtë formë të personalizuar kujdesi. Për ata që jetojnë diku tjetër dhe mbështeten tek familja, miqtë apo interneti, shërbimi “kraamzorg” është një përfitim i padëgjuar. Është një formë unike kujdesi që, sipas prindërve të intervistuar, ndihmon si prindërit ashtu edhe foshnjat të lulëzojnë.
Siç e di çdo prind i ri, ardhja në jetë e një fëmije është një kohë gëzimi të madh, por edhe stresi, mungese gjumi, ndryshimesh fizike dhe një morie këshillash shpesh kontradiktore.
Nuk është çudi që shumë nëna të reja ndihen të mbingarkuara dhe të vetmuara pas lindjes. Por Yannicelli dhe Fischel patën një përvojë ndryshe nga shumë prindër të tjerë – ato sollën në jetë fëmijët e tyre në Holandë. /skyweb.al
