Një djalë i vogël është fëmija i parë që lind në Mbretërinë e Bashkuar nga një nënë që ka bërë transplant të mitrës nga një dhuruese e ndjerë.
Hugo Powell lindi në Queen Charlotte’s and Chelsea Hospital në Londër, me peshë 3.09 kg, pasi nëna e tij, Grace Bell, kishte marrë një mitër të transplantuar nga një person që kishte ndërruar jetë.
Kjo është lindja e parë në Mbretërinë e Bashkuar duke përdorur një mitër nga një dhuruese e vdekur, ndërkohë që në Evropë janë raportuar vetëm dy raste të mëparshme.
Bell, një menaxhere programi në IT, lindi me sindromën Mayer-Rokitansky-Küster-Hauser (MRKH), një gjendje e rrallë që rezulton në një mitër të pazhvilluar ose që mungon. Ajo ishte informuar që në adoleshencë se nuk do të ishte në gjendje të mbante një fëmijë dhe e ka përshkruar lindjen e Hugos si një “mrekulli”. “Kurrë, asnjëherë nuk e kam menduar se kjo do të ishte e mundur. Jam më e lumtur se kurrë në jetën time.” Bell filloi trajtimin e fertilitetit disa muaj pas transplantit në vitin 2024. Hugo lindi në dhjetor të vitit të kaluar.
Ajo tha se mendonte çdo ditë për dhuruesen e mitrës dhe për bujarinë e familjes së saj. “Nuk ka fjalë për të falënderuar mjaftueshëm dhuruesen time dhe familjen e saj,” tha ajo. “Mirësia dhe vetëmohimi i tyre ndaj një të huaje janë arsyeja pse unë kam mundur të përmbush ëndrrën time të jetës për t’u bërë nënë.”
Pesë organe të tjera nga dhuruesja u transplantuan te katër persona, duke shpëtuar jetën e të tjerëve.
Prindërit e dhurueses thanë: “Humbja e vajzës sonë e ka shkatërruar botën tonë në mënyra që mezi mund t’i shprehim me fjalë.” Por ata shtuan: “Përmes dhurimit të organeve, ajo u ka dhënë familjeve të tjera dhuratën e çmuar të kohës, shpresës, shërimit dhe tani jetës. Si prindër të saj, ndiejmë krenari të jashtëzakonshme për trashëgiminë që ajo lë pas, një trashëgimi dhembshurie, guximi dhe dashurie që vazhdon të prekë jetë edhe pas largimit të saj.”
Bell dhe partneri i saj, Steve Poëell, i vendosën Hugos emrin e mesëm Richard, në nder të Prof. Richard Smith, drejtues klinik në Womb Transplant UK dhe kirurg konsulent gjinekologjik në Imperial College Healthcare NHS Trust. Smith, i cili ishte i pranishëm në lindje, tha: “Ka qenë një udhëtim i pabesueshëm. I gjithë ekipi ynë ka qenë i bashkuar prej vitesh për ta bërë këtë të mundur. Për mua ka qenë fantastike, thjesht e mrekullueshme.”
Organi i transplantuar do të hiqet pasi çifti të përfundojë me lindjen e fëmijëve, për ta shpëtuar Bell nga nevoja për të marrë ilaçe imunosupresive gjatë gjithë jetës. /Skyweb.al
