Agjencia Shtetërore e Kadastrës ka publikuar udhëzimin për qytetarët që duan të kryejnë rivlerësimin e pasurisë së paluajtshme, duke sqaruar procedurën e aplikimit, dokumentacionin dhe tarifat që aplikohen gjatë procesit.
Procesi nis me identifikimin në portalin e-Albania, ku qytetari duhet të zgjedhë shërbimin “Rivlerësimi i Pasurisë” dhe të konfirmojë se përfaqësuesi është i njëjtë me aplikantin.
Nis rivlerësimi i banesave, si pritet të ndikojë në uljen e çmimit të apartamenteve dhe qirave
Në hapin pasues përzgjidhet pasuria që do të rivlerësohet, ndërsa sistemi shton automatikisht edhe shërbimin për lëshimin e kopjes së kartelës së pasurisë së paluajtshme.
Më tej kërkohet ngarkimi i dokumentit të pronësisë ose aktit të ekspertimit së bashku me licencën e ekspertit në format PDF, në rast se rivlerësimi është kryer nga një ekspert i licencuar. Në faqen përfundimtare reflektohet tarifa minimale e shërbimit dhe aplikimi dërgohet përmes butonit “Dërgo”.
Kadastra sqaron se tarifa nuk është fikse, por llogaritet në varësi të shumës së tatimit që rezulton nga rivlerësimi. Sipas udhëzimit, struktura e tarifave është si më poshtë:
Deri në 150 mijë lekë tatim, tarifa është 3 500 lekë.
Nga 150 001 deri në 300 mijë lekë tatim, tarifa është 7 000 lekë.
Mbi 300 001 lekë tatim, tarifa është 10 000 lekë.
Tarifa përfshihet në faturën që qytetarët marrin në e-Albania pas verifikimit të procesit.
Udhëzimi i publikuar nga Ministria e Financave hap zyrtarisht rrugën për rivlerësimin e pronave me një normë tatimi të reduktuar prej 5 për qind, nga 15 për qind që është norma standarde. Sipas dokumentit, rivlerësimi mund të kryhet ose pranë ASHK-së mbi bazën e çmimeve minimale fiskale, ose nga një ekspert i licencuar.
Në rastet kur procedura kryhet nga Kadastra, vlerësimi bëhet sipas çmimeve minimale fiskale në fuqi në momentin e aplikimit dhe në përputhje me kuadrin ligjor për tatimin e kalimit të së drejtës së pronësisë. /skyweb.al
