Krahasuar me vitin 2024, kur importet ishin rreth 657.5 mijë ton, sasia e karburanteve të futur në treg është rritur me mbi 83 mijë ton. Nëse krahasohet me vitin 2021, diferenca është edhe më e madhe, duke reflektuar një rritje të ndjeshme të konsumit të këtij produkti që mbetet ndër mallrat kryesore të akcizës në vend.
Sipas të dhënave të Ministrisë së Financave, rritja e konsumit lidhet me disa faktorë, ndër të cilët spikat zgjerimi i aktivitetit ekonomik dhe rritja e fluksit turistik gjatë vitit të kaluar. Lëvizjet më të shumta të turistëve, por edhe përdorimi më i shpeshtë i automjeteve nga qytetarët për udhëtime dhe fundjava, kanë ndikuar në rritjen e kërkesës për karburant.
Kjo tendencë është shfaqur edhe në mallra të tjera të akcizës. Importi i kafesë gjatë vitit 2025 ka arritur në rreth 10.259 ton, duke shënuar gjithashtu nivelin më të lartë të pesë viteve të fundit. Krahasuar me vitin 2024, sasia e importuar është rritur me rreth 1.578 ton.
Në rritje ka qenë edhe importi i cigareve. Gjatë vitit 2025 janë futur në treg rreth 3.636 ton cigare, shifra më e lartë në pesë vitet e fundit. Të dhënat tregojnë se konsumi i duhanit mbetet i qëndrueshëm, pavarësisht rritjes graduale të çmimeve të paketave dhe peshës që ato zënë në shpenzimet e familjeve.
Ndryshe nga këto produkte, importi i birrës ka shënuar një rënie gjatë vitit 2025 në krahasim me një vit më parë. Sasia e futur për konsum ka qenë rreth 56.6 mijë ton, nga 59.3 mijë ton që ishin importuar në vitin 2024. Megjithatë, në krahasim me vitet e mëparshme, importi i këtij produkti mbetet në nivele më të larta.
Rritja e konsumit të mallrave të akcizës është reflektuar edhe në të ardhurat buxhetore. Gjatë periudhës janar-dhjetor 2025, të ardhurat nga akcizat arritën në 69.6 miliardë lekë, rreth 6.2 miliardë lekë më shumë se në të njëjtën periudhë të vitit 2024, duke shënuar një rritje prej 9.7 për qind. Këto shifra tregojnë për një aktivitet ekonomik më të lartë dhe një zgjerim të konsumit në tregun vendas.
